“பஸ்ஸில் தவறவிட்ட ரூ.38,000″… அடுத்த சில நிமிடங்களில் ஓசூர் போலீஸ் ஸ்டேஷனில் நடந்த ட்விஸ்ட்…. கண்ணீர் மல்க நின்ற இளைஞர்…..!

தர்மத்தின் வாழ்வுதனை சூது கவ்வும், தர்மம் மறுபடியும் வெல்லும் என்ற பழமொழியை மெய்ப்பிக்கும் வகையில், கிருஷ்ணகிரி மாவட்டம் ஓசூர் அருகே மனிதாபிமானத்தை உரக்கச் சொல்லும் உன்னதமான நெகிழ்ச்சிச் சம்பவம் ஒன்று நடந்துள்ளது. இன்றைய காலகட்டத்தில் சுயநலமே பிரதானமாக இருக்கும் சூழலில், பிறர் பணத்திற்கு ஆசைப்படாமல் ஒரு பெண்மணி காட்டிய நேர்மை, ஓசூர் மற்றும் அதன் சுற்றுவட்டார பகுதி மக்களிடையே பெரும் நெகிழ்ச்சியையும் பாராட்டுகளையும் குவித்து வருகிறது.

சூளகிரி அருகே உள்ள எலசேப்பள்ளி கிராமத்தைச் சேர்ந்த 28 வயது இளைஞரான முனிரத்னா, தனது அவசரத் தேவைக்காக 38 ஆயிரம் ரூபாய் பணத்தை ஒரு கைப்பையில் பத்திரமாக வைத்துக்கொண்டு, பெரிகை பகுதியிலிருந்து அரசு பேருந்து மூலம் சூளகிரி நோக்கிப் பயணம் செய்துள்ளார். பேருந்து சூளகிரி நிலைய வந்தடைந்ததும், ஏதோ ஒரு கவனச் சிதறலில் தான் வைத்திருந்த பணப்பையை இருக்கையிலேயே மறதியாக விட்டுவிட்டு இறங்கிச் சென்றுவிட்டார். சிறிது நேரம் கழித்து பணப்பை தொலைந்ததை உணர்ந்த முனிரத்னா, பல இடங்களில் தேடியும் கிடைக்காததால் அதிர்ச்சியிலும் மிகுந்த மன உளைச்சலிலும் உறைந்து போனார்.

அதே நேரத்தில், சூளகிரி பஜார் தெருவைச் சேர்ந்த 50 வயதான ஜோஸ்வின் என்ற பெண்மணி, அதே அரசு பேருந்தில் ஏறியுள்ளார். அவர் இருக்கையில் அமர்ந்தபோது அங்கிருந்த கைப்பையைக் கண்டு, அதனைத் திறந்து பார்த்துள்ளார். உள்ளே கட்டுக்கட்டாக 500 ரூபாய் நோட்டுகள் இருப்பதைக் கண்டு வியப்படைந்த ஜோஸ்வின், ஒரு கணம் கூட பேராசைப்படாமல், அந்தப் பணத்தை எடுத்துக்கொண்டு நேராக சூளகிரி காவல் நிலையத்திற்குச் சென்று போலீசாரிடம் ஒப்படைத்தார். இக்கட்டான சூழ்நிலையிலும் அந்தப் பெண்மணி காட்டிய இந்த அசாத்திய நேர்மை அங்கிருந்த காவலர்களைப் பெரிதும் கவர்ந்தது.

காவல் துறையினர் உடனடியாகச் செயல்பட்டு, கைப்பையில் இருந்த அடையாள அட்டை மற்றும் ஆவணங்கள் மூலம் அது முனிரத்னாவின் பணம் என்பதை உறுதி செய்து அவரைத் தொடர்பு கொண்டனர். காவல் நிலையம் ஓடோடி வந்த முனிரத்னா, தனது பணம் பத்திரமாக இருப்பதைக் கண்டு கண்ணீர் மல்க ஜோஸ்வினுக்குத் தனது மனமார்ந்த நன்றியைத் தெரிவித்துக்கொண்டார். நேர்மையின் அடையாளமாகத் திகழ்ந்த ஜோஸ்வினைப் பாராட்டி காவல் துறையினர் சால்வை அணிவித்து கௌரவித்தனர். ஒரு சாதாரணப் பெண்ணின் இந்த உன்னதமான செயல், சமூக வலைதளங்களிலும் பலரால் கொண்டாடப்பட்டு, “நேர்மை ஒரு போதும் தோற்பதில்லை” என்பதை மீண்டும் நிரூபித்துள்ளது.