தமிழகத்தில் நுகர்வோரின் மின் பயன்பாட்டைக் கணக்கிட, மின்வாரிய ஊழியர்களின் உதவியின்றிச் செயல்படும் சுமார் ரூ. 20,000 கோடி மதிப்பிலான ‘ஸ்மார்ட் மீட்டர்’ திட்டத்தை முழுமையாகக் கைவிடத் தமிழக அரசு முடிவு செய்துள்ளது. மாநிலம் முழுவதும் மொத்தம் 3.04 கோடி ஸ்மார்ட் மீட்டர்களைப் பொருத்த திட்டமிடப்பட்டு, அதற்கான உலகளாவிய டெண்டர் கோரப்பட்டிருந்தது. இந்த பிரம்மாண்ட திட்டத்தில் பங்கேற்க 50-க்கும் மேற்பட்ட நிறுவனங்கள் விருப்பம் தெரிவித்துப் போட்டியிட்ட நிலையில், தற்போது அந்த டெண்டர்களைத் திறக்காமலேயே ரத்து செய்வதற்கான அதிரடி நடவடிக்கைகளில் மின்வாரியம் இறங்கியுள்ளது.
மின்வாரிய ஊழியர்களின் வேலை பாதுகாப்பு, சங்கங்களின் தொடர் எதிர்ப்புகள் மற்றும் இத்திட்டத்திற்காகக் கூடுதலாகக் கோரப்பட்ட பெரும் செலவினங்கள் (நிதிச்சுமை) ஆகியவற்றை மிக முக்கியக் காரணங்களாகக் கருத்தில் கொண்டே அரசு இந்த அதிரடித் திருப்பத்தை மேற்கொண்டுள்ளதாகத் தெரிகிறது. ஏற்கனவே இந்தத் திட்டத்தின் முந்தைய டெண்டர்கள் சில நிர்வாகக் காரணங்களாலும், நிறுவனங்கள் குறிப்பிட்ட கூடுதல் கட்டணங்களாலும் ரத்து செய்யப்பட்டிருந்த நிலையில், தற்போது ஒட்டுமொத்த திட்டத்தையுமே கைவிடும் நோக்கில் டெண்டர்கள் ரத்து செய்யப்பட்டு வருவது மின்சாரத் துறை வட்டாரத்தில் பெரும் பரபரப்பை ஏற்படுத்தியுள்ளது.