டெல்லி மற்றும் டேராடூன் இடையேயான பயண நேரத்தைக் குறைக்கும் நோக்கில் பெரும் எதிர்பார்ப்புடன் சமீபத்தில் திறந்து வைக்கப்பட்ட ‘டெல்லி – டேராடூன் விரைவுச்சாலையில்’ (Delhi-Dehradun Expressway), திடீரென ஒரு ராட்சத பள்ளம் ஏற்பட்டுள்ள வீடியோ இணையத்தில் தீயாய் பரவி வருகிறது. பல கோடி ரூபாய் செலவில் நவீன தொழில்நுட்பத்துடன் கட்டப்பட்டதாகக் கூறப்படும் இந்தச் சாலையில், திறக்கப்பட்ட சில நாட்களிலேயே இவ்வளவு பெரிய பள்ளம் விழுந்தது பயணிகளிடையே பெரும் அச்சத்தையும் பரபரப்பையும் ஏற்படுத்தியுள்ளது.
சமூக வலைதளங்களில் வைரலாகி வரும் இந்த வீடியோவில், சாலையின் ஒரு பகுதி கடுமையாகச் சேதமடைந்து அபாயகரமான பள்ளம் ஏற்பட்டுள்ளதைக் காண முடிகிறது. இதைப் பார்த்த நெட்டிசன்கள், “இதுவா உலகத்தரம் வாய்ந்த சாலை?” என்றும், “மக்களின் வரிப்பணம் இப்படித்தான் வீணடிக்கப்படுகிறதா?” என்றும் காட்டமாக விமர்சித்து வருகின்றனர். மேலும், இந்தச் சாலைப் பணிகளின் தரம் குறித்து விசாரணை நடத்த வேண்டும் என்றும், சம்பந்தப்பட்ட ஒப்பந்ததாரர்கள் மற்றும் அதிகாரிகள் மீது கடும் நடவடிக்கை எடுக்க வேண்டும் என்றும் கோரிக்கைகள் எழுந்துள்ளன.
View this post on Instagram
வேகமாகச் செல்லும் வாகனங்கள் இத்தகைய திடீர் பள்ளங்களால் விபத்துக்குள்ளாகும் அபாயம் இருப்பதால், அதிகாரிகள் உடனடியாக அந்தப் பகுதியைச் சீரமைக்க வேண்டும் எனப் பொதுமக்கள் வலியுறுத்தி வருகின்றனர். நவீன வசதிகளுடன் கூடிய நெடுஞ்சாலைகளில் கூடப் பருவமழைக்கோ அல்லது சாதாரணப் பயன்பாட்டிற்கோ தாக்குப் பிடிக்க முடியாமல் பள்ளங்கள் விழுவது, கட்டுமானத் துறையில் நிலவும் ஊழல் மற்றும் அலட்சியத்தையே காட்டுவதாகப் பலரும் எக்ஸ் (X) தளத்தில் பதிவிட்டு வருகின்றனர்.