மாணவியை ரம்பத்தால் தாக்கிய விவகாரம்…! குற்றவாளியின் வலது கால் அகற்றம்… ஆந்திராவில் பரபரப்பு சம்பவம்…!!

ஆந்திர மாநிலத்தில் வகுப்பறைக்குள் புகுந்து 10-ஆம் வகுப்பு மாணவியை மரம் அறுக்கும் ரம்பத்தால் கொடூரமாகத் தாக்கிய குற்றவாளி ஹேமந்தின் வலது கால் துப்பாக்கிச் சூட்டுப் காயங்களால் அகற்றப்பட்ட சம்பவம் பெரும் பரபரப்பை ஏற்படுத்தியுள்ளது.

ஆந்திர மாநிலத்தில் உள்ள பள்ளி ஒன்றில், 10-ஆம் வகுப்பு பயின்று வரும் மாணவியின் வகுப்பறைக்குள் அதிரடியாகப் புகுந்த 21 வயதான ஹேமந்த் என்ற நபர், தான் கொண்டு வந்திருந்த மரம் அறுக்கும் ரம்பத்தால் அந்த மாணவியைச் சரமாரியாக வெட்டித் தாக்கிவிட்டுத் தப்பியோடினார். இச்சம்பவம் மாநிலம் முழுவதும் பெரும் அதிர்ச்சியையும் பெற்றோர் மத்தியில் கொந்தளிப்பையும் ஏற்படுத்தியது.

இதையடுத்துத் தீவிரத் தேடுதல் வேட்டையில் ஈடுபட்ட காவல்துறையினர் ஹேமந்தைக் கைது செய்தனர். கைது செய்யப்பட்ட குற்றவாளியை வழக்கு விசாரணை மற்றும் சம்பவ இடத்திற்கு அழைத்துச் சென்றபோது, ஹேமந்த் காவல்துறையினரைத் தாக்கிவிட்டுத் தப்பியோட முயன்றுள்ளார். உடனடியாகச் செயல்பட்ட போலிஸார் அவரை துப்பாக்கியால் சுட்டுப் பிடித்தனர்.

இதில் அவரது வலது காலில் குண்டடிபட்டுக் காயம் ஏற்பட்டது. மருத்துவமனையில் அனுமதிக்கப்பட்ட ஹெமந்திற்கு காலில் ரத்த ஓட்டம் சீராக இயங்காமல் திசுக்கள் அழுகத் தொடங்கியதை அடுத்து, மருத்துவர்கள் அறுவை சிகிச்சை மூலம் வலது காலைத் துண்டித்து அகற்றியுள்ளனர்.