திடீர் திருப்பம்…. தவெக-வை வீழ்த்த கூட்டணி அமைக்கிறதா திமுக-அதிமுக?… சீமான் சொன்ன ஷாக்கிங் பதில்…. சீக்ரெட்டை உடைத்த தராசு ஷ்யாம்….!

தமிழக அரசியலில் தவெக ஒரு புதிய சக்தியாக உருவெடுத்துள்ள நிலையில், எதிர்வரும் இடைத்தேர்தல்களை மையமாக வைத்து அரசியல் களத்தில் பல்வேறு புதிய கணக்குகள் விவாதிக்கப்பட்டு வருகின்றன. குறிப்பாக, நாம் தமிழர் கட்சியின் ஒருங்கிணைப்பாளர் சீமானை அனைத்துக் கட்சிகளும் இணைந்து ‘பொது வேட்பாளராக’ நிறுத்துமா என்ற கேள்வியும் எழுந்துள்ளது. இந்தச் சூழலில், தமிழக அரசியல் வரலாற்றில் ‘பொது வேட்பாளர்’ என்ற அரசியல் தந்திரம் எந்த அளவுக்கு சாத்தியமானது என்பது குறித்து மூத்த பத்திரிகையாளரும் வழக்கறிஞருமான தராசு ஷ்யாம் தனது கருத்துக்களையும் வரலாற்றுப் பின்னணியையும் பகிர்ந்துள்ளார்.

‘தமிழ்க்குரல்’ யூடியூப் சேனலுக்கு அளித்த பேட்டியில் தராசு ஷ்யாம் குறிப்பிடுகையில், திமுக அல்லது அதிமுக போன்ற திராவிட முதன்மை இயக்கங்கள் எந்தக் காலத்திலும் பொது வேட்பாளர் என்ற முறையை ஏற்றுக்கொள்ளாது என்று உறுதியாகத் தெரிவித்துள்ளார். அதற்குச் சான்றாக 1996-ஆம் ஆண்டு புதுக்கோட்டை இடைத்தேர்தல் சுவாரசியத்தை அவர் நினைவு கூர்ந்தார். அப்போதைய முதல்வர் ஜெயலலிதாவின் வேட்பாளரை வீழ்க்க வேண்டும் என்பதற்காக முன்னாள் சபாநாயகர் ராஜாராம் தலைமையிலும் அழகர் சின்னரெட்டி முன்னிலையிலும் ஒரு குழு அமைக்கப்பட்டது. அதில் தானும் உறுப்பினராக இருந்து, அறிவாலயத்திலும் ஆலிவர் சாலை இல்லத்திலும் அப்போதைய திமுக தலைவர் கருணாநிதியுடன் சுமார் ஐந்து சுற்றுப் பேச்சுவார்த்தைகள் நடத்தியதாகக் குறிப்பிட்டார்.

அந்தப் பேச்சுவார்த்தையின் போது, “வேண்டுமானால் ஜெயலலிதாவின் வேட்பாளர் வெற்றி பெறட்டும், அடுத்த தேர்தலில் பார்த்துக்கொள்ளலாம்” என்ற யோசனை முன்வைக்கப்பட்ட போதும், “கட்சியையும் தொண்டர்களையும் பலிகொடுத்துவிட்டு பொது வேட்பாளரை ஆதரிக்க முடியாது” என கருணாநிதி தீர்க்கமாக மறுத்துவிட்டார். தேர்தல் களத்தில் கூட்டணிகள் அமைப்பது இயல்பானது; ஆனால், அனைத்துக் கட்சிகளும் ஒன்றுசேர்ந்து ஒரே பொது வேட்பாளரை நிறுத்துவது நடைமுறைக்குச் சாத்தியமற்றது என்பதை இந்த சம்பவம் உணர்த்துவதாக அவர் சுட்டிக்காட்டுகிறார். தமிழகத்தில் எப்போதும் 4 முதல் 5 முனைப்போட்டி நிலவும் சூழலில் சட்டமன்றத் தேர்தலில் பொது வேட்பாளர் என்ற தத்துவத்திற்கு வாய்ப்பே இல்லை என்றும் அவர் தெளிவாகக் கூறியுள்ளார்.

தற்போதைய சூழலில் விஜய் தலைமையிலான தவெக அளிக்கும் தாக்கத்தை எதிர்கொள்ள வேண்டும் என்ற நோக்கில் மட்டுமே இதுபோன்ற பொது வேட்பாளர் பற்றிய பேச்சுக்கள் மேலெழும்புகின்றனவே தவிர, இதில் அரசியல் ரீதியான சாத்தியக்கூறுகள் மிகவும் குறைவு. அதேவேளையில், சீமான் தன்னைத்தானே பொது வேட்பாளராக அறிவித்துக்கொண்டிருக்க வேண்டிய அவசியமில்லை என்றும், மற்ற எதிர்க்கட்சிகள் தீவிரமாக யோசித்திருந்தால் இந்த நிலை வந்திருக்காது என்றும் தராசு ஷ்யாம் விவரித்தார். மேலும், சீமான் உண்மையிலேயே இந்த இடைத்தேர்தலில் நேரடியாகப் போட்டியிடுவாரா என்பதே கேள்விக்குறியாக உள்ளது என்றும் அவர் சந்தேகம் எழுப்பியுள்ளார்.

குறிப்பாக, நாம் தமிழர் கட்சிக்கு இருக்கும் வாக்கு சதவீதம் இடைத்தேர்தல் களத்தில் அதிகரிப்பதை விடக் குறைவதற்கே அதிக வாய்ப்புகள் உள்ளன. தம் கட்சியின் செல்வாக்கை பரிசோதித்துப் பார்க்கவே சீமான் இந்த வாய்ப்பைப் பயன்படுத்த முயல்கிறார். எனவே, பேசப்பட்டு வரும் அம்பாசமுத்திரம் தொகுதியில் சீமான் போட்டியிடுவார் என்று தான் எதிர்பார்க்கவில்லை எனத் தெரிவித்துள்ள தராசு ஷ்யாம், தமிழகத்தின் திராவிட மற்றும் கூட்டணிக் கட்டமைப்பு அரசியல் சூழலில் ‘பொது வேட்பாளர்’ என்பது வெறும் விவாதப் பொருளாக மட்டுமே எஞ்சும் என்று தனது பேட்டியை நிறைவு செய்துள்ளார்.