நள்ளிரவு 3 மணிக்கு கேட்ட அந்த அலறல் சத்தம்… விபூதி, குங்குமத்தோடு கேமரா முன் வந்த தாய்… செஞ்சி சிறுமி கடத்தலில் புதிய திருப்பம்….!

விழுப்புரம் மாவட்டம் செஞ்சி அருகேயுள்ள ஆலம்பூண்டி கிராமத்தைச் சேர்ந்த 7 வயது சிறுமி ஹேமலதா மாயமாகி 23 நாட்களாகும் நிலையில், அந்தப் பகுதியே பெரும் அதிர்ச்சியிலும் சோகத்திலும் மூழ்கியுள்ளது. தொடக்கத்தில் சத்தியமங்கலம் காவல்துறையினர் மேற்கொண்ட விசாரணையில் எவ்வித முன்னேற்றமும் கிடைக்காததால், கடந்த 21-ஆம் தேதி முதல் இவ்வழக்கு சிபிசிஐடி விசாரணைக்கு மாற்றப்பட்டது. தற்போது சிபிசிஐடி டிஎஸ்பிக்கள் கீதா மற்றும் வேல்முருகன் தலைமையிலான தனிப்படையினர், சிறுமியின் குடும்பத்தினர், பள்ளி ஆசிரியர்கள், உள்ளூர்வாசிகள், சரித்திரப் பதிவேடு குற்றவாளிகள் மற்றும் வடமாநிலத் தொழிலாளர்கள் வரை பலரிடமும் தீவிர விசாரணை நடத்தி வருகின்றனர்.

சிறுமியின் தாய் மீதே குழந்தையை விற்றுவிட்டதாக சில சந்தேகங்களும் வதந்திகளும் எழுந்த நிலையில், “என் பிள்ளையை நானே ஏன் தூக்கிக் கொடுக்கப் போகிறேன்? பிறந்தபோதே அப்படிச் செய்திருக்க மாட்டேனா?” என தாய் பவானி கண்ணீர் மல்கக் கதறுகிறார். சிறுமி கடத்தப்பட்ட இரவில் ‘அம்மா அம்மா’ என்ற அழுகுரல் கேட்டதாகப் பக்கத்து வீட்டுப் பெண் கூறிய தகவலும், மயக்க மருந்து கொடுத்துக் கடத்தப்பட்டிருக்கலாம் என்ற கோணமும் விசாரணையை மேலும் தீவிரப்படுத்தியுள்ளது. இருப்பினும், சிறுமிக்கு அசம்பாவிதம் எதுவும் நடந்திருக்க வாய்ப்பில்லை என்றும், நிச்சயமாக உயிருடன் மீட்போம் என்றும் சிபிசிஐடி அதிகாரிகள் நம்பிக்கை தெரிவித்துள்ளனர்.

குழந்தையைக் கண்டுபிடிக்கக் கோரி தாய் பவானி தினமும் விநாயகர் கோவிலில் கற்பூரம் ஏற்றி வழிபட்டு வருகிறார். சிறுமிக்கு ஆயுள் பலம் உறுதியாக இருப்பதாக ஜாதகக் கணிப்புகளும் கூறுவதால், தாய் பவானியின் நம்பிக்கை இன்னும் தளரவில்லை. அதிகாரிகள் கொடுத்த உறுதியும், தாயின் மாறாத பாசமும் அவரை இந்த இக்கட்டான சூழலிலும் தாங்கிப் பிடித்து நிற்கிறது.

எப்படியாவது தன் மகள் மீண்டு வந்துவிடுவாள் என்ற அசைக்க முடியாத நம்பிக்கையோடு, வரும் தீபாவளிப் பண்டிகைக்காகச் சிறுமிக்கு புதிய ஆடைகளை வாங்கி எடுத்து வைத்துக்கொண்டு தாய் காத்திருக்கிறார். சிறுமி ஹேமலதா பாதுகாப்பாக வீடு திரும்பி, தாயின் அணைப்பில் தீபாவளியைக் கொண்டாட வேண்டும் என்பதே அப்பகுதி மக்கள் அனைவரின் ஏகோபித்த பிரார்த்தனையாக உள்ளது.