முடிவுக்கு வந்த 20 ஆண்டு கால சாம்ராஜ்யம்… தமிழக நிறுவனத்தை தட்டித் தூக்கிய அம்பானி… ரூ.156 கோடிக்கு நடந்த மெகா டீல்… அதிர்ச்சியில் வர்த்தக உலகம்…!

தமிழகத்தின் முன்னணி ஆரோக்கிய உணவு நிறுவனமான ‘மன்னா ஹெல்த் மிக்ஸ்’ (Manna Health Mix) நிறுவனத்தை, முகேஷ் அம்பானியின் ரிலையன்ஸ் கன்ஸ்யூமர் புரோடக்ட்ஸ் லிமிடெட் (RCPL) சுமார் 156 கோடி ரூபாய்க்கு கையகப்படுத்தியுள்ளது. கடந்த 20 ஆண்டுகளுக்கும் மேலாக சிறுதானியங்கள், ஓட்ஸ் மற்றும் குழந்தைகளுக்கான சத்துணவு தயாரிப்பில் தடம் பதித்துள்ள மன்னா பிராண்ட், இனி ரிலையன்ஸ் குழுமத்தின் ஒரு அங்கமாகச் செயல்படும் என அதிகாரப்பூர்வமாக அறிவிக்கப்பட்டுள்ளது.

சமீபகாலமாக தமிழகத்தைச் சேர்ந்த பாரம்பரியமிக்க நிறுவனங்களை ரிலையன்ஸ் நிறுவனம் தொடர்ந்து கையகப்படுத்தி வருகிறது. ஏற்கனவே உயர்தர பருப்பு வகைகளுக்குப் பெயர்பெற்ற ‘உதயம்’ பருப்பு நிறுவனம் மற்றும் ‘சில்’ (SiL) போன்ற பிராண்டுகளை ரிலையன்ஸ் வாங்கியுள்ள நிலையில், தற்போது மன்னா ஹெல்த் மிக்ஸையும் தனது பட்டியலில் இணைத்துள்ளது. இதன் மூலம் தமிழக சந்தையில் ரிலையன்ஸ் தனது ஆதிக்கத்தை மேலும் வலுப்படுத்தியுள்ளது.

மக்களிடையே அதிகரித்து வரும் ஆரோக்கியமான உணவுப் பழக்கவழக்கங்கள் மற்றும் இயற்கை சார்ந்த சத்துணவுப் பொருட்களுக்கான தேவையை கருத்தில் கொண்டே இந்த வர்த்தக ஒப்பந்தம் மேற்கொள்ளப்பட்டுள்ளது. உலகத்தரம் வாய்ந்த ஆரோக்கியமான உணவுகளை சாமானிய மக்களுக்கும் மலிவான விலையில் கொண்டு சேர்ப்பதே ரிலையன்ஸ் நிறுவனத்தின் முக்கிய நோக்கம் என்று ரிலையன்ஸ் நிறுவனத்தின் இயக்குனர் டி. கிருஷ்ணகுமார் தெரிவித்துள்ளார்.

இந்த 156 கோடி ரூபாய் மதிப்பிலான ஒப்பந்தமானது தமிழக உணவு உற்பத்தி துறையில் ஒரு முக்கிய நகர்வாகப் பார்க்கப்படுகிறது. ரிலையன்ஸ் நிறுவனத்தின் பரந்து விரிந்த விற்பனை வலையமைப்பு மூலம், தமிழகத்தின் மன்னா ஹெல்த் மிக்ஸ் பொருட்கள் இனி இந்தியா முழுவதும் உள்ள மூலை முடுக்குகளுக்கெல்லாம் எளிதாகச் சென்றடையும் என எதிர்பார்க்கப்படுகிறது. இது அந்த நிறுவனத்தின் அடுத்தகட்ட வளர்ச்சிக்கு பெரும் வாய்ப்பாக அமையும்.