தங்கம் என்பது வெறும் உலோகமாக மட்டுமல்லாமல், இந்தியர்களின் கலாச்சாரத்தில் இரண்டறக் கலந்த ஒரு முக்கிய அங்கமாகும். தங்கம் விலை தொடர்ந்து உச்சத்தில் இருப்பதால், சாமானிய மக்கள் அதை வாங்குவது சவாலாக மாறியுள்ளது. இந்தச் சூழலில், ஆய்வகங்களில் செயற்கையாக உருவாக்கப்படும் தங்கம் குறித்த செய்திகள் வணிக உலகில் பெரும் கவனத்தைப் பெற்றுள்ளன. இது கவரிங் நகைகளைப் போலப் போலியானதல்ல, மாறாக இயற்கை தங்கத்திற்கு இணையான வேதியியல் பண்புகளைக் கொண்ட 100% உண்மையான தங்கமாகும்.
இந்த ஆய்வகத் தங்கம், பூமியின் சுரங்கங்களில் இருந்து வெட்டி எடுக்கப்படாமல், கட்டுப்படுத்தப்பட்ட ஆய்வகச் சூழலில் அணு அணுவாக உருவாக்கப்படுகிறது. இயற்கை தங்கத்தில் உள்ள அதே அணு அமைப்பு, அடர்த்தி, உருகுநிலை மற்றும் தூய்மை (24 காரட் வரை) இதிலும் காணப்படுகிறது. சுருக்கமாகச் சொன்னால், தொழில்நுட்ப வளர்சியால் ஆய்வகத்தில் உருவாக்கப்படும் தங்கம், இயற்கை தங்கத்துடன் முழுமையாக ஒத்துப்போகிறது. இதனால் தற்போதைய நிலையில், இரண்டிற்கும் இடையிலான வேறுபாட்டைக் கண்டறிவது கடினமாக உள்ளது.
தற்போது ஆய்வகத் தங்கம் சோதனை முறையிலேயே உள்ளது. செயற்கை வைரங்கள் வணிக ரீதியாகப் பெரும் வெற்றியைப் பெற்றதைப் போல, இதுவும் எதிர்காலத்தில் வணிக ரீதியாக உற்பத்தி செய்யப்படும் என்று எதிர்பார்க்கப்படுகிறது. ஆய்வகத் தங்கம் இன்னும் சோதனை நிலையிலேயே இருப்பதால், ஆரம்பத்தில் இதன் உற்பத்திச் செலவு சற்று அதிகமாகவே இருக்கும். இருப்பினும், முழுமையான வணிக உற்பத்தி தொடங்கும்போது, தங்கம் சந்தையில் இது பெரும் தாக்கத்தை ஏற்படுத்தும் என ஆய்வாளர்கள் கருதுகின்றனர்.
எதிர்காலத்தில் ஆய்வகத் தங்கத்தின் உற்பத்தி அதிகரிக்கும் பட்சத்தில், இயற்கை தங்கத்தின் மீதான மோகம் குறைய வாய்ப்புள்ளது. இது பணவீக்கத்திற்கு எதிரான ஒரு பாதுகாப்பான முதலீடாகக் கருதப்படும் தங்கத்தின் மதிப்பில் மாற்றங்களை ஏற்படுத்தலாம். இருப்பினும், இது போன்ற மாற்றங்கள் நிகழ இன்னும் பல ஆண்டுகள் ஆகும். சுருக்கமாகச் சொன்னால், ஆய்வகத் தங்கம் தற்போதைய தங்கம் சந்தையில் ஒரு முக்கிய மாற்றத்திற்கான தொடக்கப் புள்ளியாகவே பார்க்கப்படுகிறது.