பீகார் மாநிலம் போஜ்பூர் மாவட்டம் நவாடா காவல் எல்லைக்குட்பட்ட ஜெயின் கல்லூரி அருகே, ஓய்வுபெற்ற சுங்கத்துறை அதிகாரியான ராம்குமார் சிங் கொடூரமாகக் கொல்லப்பட்டார். தனது மகனுடன் வழக்கம்போல் காலை நடைப்பயிற்சியில் ஈடுபட்டிருந்தபோது, வீட்டின் அருகிலேயே பதுங்கியிருந்த மர்ம நபர்கள் அவர் மீது அடுத்தடுத்து எட்டு முறை துப்பாக்கியால் சுட்டுவிட்டுத் தப்பியோடினர். மகனின் கண்முன்னே அரங்கேறிய இந்தத் துணிகரத் தாக்குதல் சம்பவம் அப்பகுதி மக்களிடையே பெரும் அதிர்ச்சியையும் அச்சத்தையும் ஏற்படுத்தியுள்ளது.
நீண்ட நாட்களாக நீடித்து வரும் நிலத்தகராறு காரணமாகவே இந்தத் திட்டமிட்ட கொலை நடந்திருக்கலாம் என முதற்கட்ட விசாரணையில் சந்தேகிக்கப்படுகிறது. சம்பவ இடத்திற்கு விரைந்த காவல்துறையினர் உடலைக் கைப்பற்றி உடற்கூறாய்வுக்கு அனுப்பி வைத்துள்ளனர். துப்பாக்கிச் சூடு நடத்திவிட்டுத் தலைமறைவான மர்மக் கும்பலை அடையாளம் காணும் முயற்சியில் தீவிர தேடுதல் வேட்டை நடைபெற்று வருகிறது.