டெல்லியில் உள்ள ஃபாரஸ்ட் வியூ அடுக்குமாடிக் குடியிருப்புப் பகுதியில் புகுந்த ஒரு பெரிய மலைப்பாம்பை வனவிலங்கு பாதுகாப்புப் பணியாளர்கள் பாதுகாப்பாக மீட்டனர். வீட்டில் உள்ள பழைய பொருட்களுக்கு மத்தியில் மரக்கட்டிலுக்கு அடியில் பதுங்கியிருந்த அந்தப் பாம்பை, பாதுகாப்பு கையுறைகளை அணிந்திருந்த பணியாளர் ஒருவர் மிகவும் கவனமாகப் பிடித்து வெளியே இழுத்தார். அப்போது பாம்பு அவரது கையைச் சுற்றிக் கொண்டாலும், சக ஊழியரின் உதவியுடன் பாம்பிற்கு எவ்வித காயமும் இன்றி பத்திரமாக மீட்டு, அதனை ஒரு பாதுகாப்பான கூண்டிற்குள் அடைத்தனர்.
இவ்வாறு குடியிருப்புப் பகுதிக்குள் நுழைந்த இந்த மலைப்பாம்பு, அருகில் அமைந்துள்ள அசோலா பட்டி வனவிலங்கு சரணாலயத்தில் இருந்து வந்திருக்க வாய்ப்புள்ளது என அதிகாரிகள் கருதுகின்றனர். பொதுவாகப் பருவமழைக் காலங்களில் காடுகளில் ஏற்படும் மாற்றங்களால் வனவிலங்குகள் வழிமாறி மனிதர்கள் வாழும் குடியிருப்புகளுக்குள் நுழைவது வாடிக்கையான ஒன்றுதான் என்பது குறிப்பிடத்தக்கது.