“விபத்து அல்ல, பக்காவான ஸ்கெட்ச்”… புனே தொழிலதிபர் மரணத்தில் வருங்கால மனைவி செய்த கொடூரம்… ‘ட்விஸ்ட்’ மேல் ‘ட்விஸ்ட்’ கொடுக்கும் புனே வழக்கு….!

மகாராஷ்டிர மாநிலம் புனே அருகே உள்ள லோகாத் கோட்டையில் தொழிலதிபர் கேதன் அகர்வால் மர்மமான முறையில் உயிரிழந்த சம்பவம் நாடு முழுவதும் பெரும் அதிர்வலைகளை ஏற்படுத்தியுள்ளது. கடந்த ஜூன் 18ஆம் தேதி தனது வருங்கால மனைவியான சியா கோயலுடன் கோட்டைக்குச் சென்ற கேதன், அங்குள்ள பள்ளத்தாக்கில் விழுந்து உயிரிழந்தார். ஆரம்பத்தில் இது ஒரு துரதிர்ஷ்டவசமான விபத்து என்று கூறப்பட்ட நிலையில், போலீசாரின் தீவிர விசாரணையில் பல அதிர்ச்சியூட்டும் தகவல்கள் வெளியாகின. இதையடுத்து, இந்த விபத்து மரண வழக்கை திட்டமிட்ட கொலை வழக்காக மாற்றிய போலீசார், சியா கோயல் மற்றும் அவரது நண்பரான சேதன் சௌத்ரி ஆகிய இருவரையும் கைது செய்து சிறையில் அடைத்துள்ளனர்.

திருமண நிச்சயதார்த்தம் முடிந்த பிறகும் சியா கோயல், சேதன் சௌத்ரியுடன் நெருங்கிய தொடர்பில் இருந்ததாக போலீசார் குற்றம் சாட்டுகின்றனர். இந்தத் திருமணத்தில் விருப்பமில்லாத சியா, தங்களது உறவுக்கு கேதன் தடையாக இருப்பதாகக் கருதி இந்த கொடூரச் செயலை அரங்கேற்றியதாக விசாரணை அமைப்புகள் தெரிவிக்கின்றன. இதற்கிடையில், இந்த வழக்கில் சியா கோயல் தரப்பு வழக்கறிஞர் ஆஷுதோஷ் ஸ்ரீவாஸ்தவா நீதிமன்றத்தில் முன்வைத்துள்ள புதிய சட்ட வாதம் பெரும் திருப்பத்தை ஏற்படுத்தியுள்ளது. சம்பவம் நடந்த இடத்தில் கொலையை நேரில் பார்த்த சாட்சிகள் யாரும் இல்லை என்றும், சியாவை இந்த குற்றத்துடன் நேரடியாக இணைக்கும் உறுதியான ஆதாரங்கள் இதுவரை சமர்ப்பிக்கப்படவில்லை என்றும் அவர் வாதிட்டுள்ளார்.

குற்றவியல் சட்டத்தின்படி, வெறும் சந்தேகத்தின் அடிப்படையில் மட்டுமே ஒருவரை குற்றவாளி என்று முடிவு செய்துவிட முடியாது; குற்றம் நிரூபிக்கப்படும் வரை ஒவ்வொரு நபரும் நிரூபராதியே என்று சியா தரப்பு வாதிடுகிறது. நேரடி சாட்சிகள் இல்லாத இதுபோன்ற வழக்குகளில், போலீசார் முன்வைக்கும் சூழ்நிலை ஆதாரங்கள் அனைத்தும் சங்கிலித் தொடர் போல ஒன்றோடொன்று மிகத் துல்லியமாக இணைய வேண்டும். அவ்வாறு இருந்தால் மட்டுமே நீதிமன்றம் அதனைத் தண்டனைக்குரிய ஆதாரமாக ஏற்கும் என்பதால், இந்த வழக்கில் சட்ட ரீதியான சவால்கள் அதிகரித்துள்ளன.

மறுபுறம், இந்த வழக்கை நிரூபிக்க டிஜிட்டல் மற்றும் தொழில்நுட்ப ஆதாரங்களையே போலீசார் பெரிதும் நம்பியுள்ளனர். குற்றம் சாட்டப்பட்டவர்களின் மொபைல் போன் உரையாடல்கள், குறுஞ்செய்திகள், சிசிடிவி காட்சிகள் மற்றும் இருப்பிடத் தரவுகள் போன்றவற்றைச் சேகரித்து வருவதாக விசாரணை அதிகாரிகள் தெரிவித்துள்ளனர். சமூக வலைத்தளங்களில் இந்த வழக்கு குறித்துப் பல்வேறு ஊகங்கள் பரவி வந்தாலும், நீதிமன்றத்தில் சமர்ப்பிக்கப்படும் டிஜிட்டல் மற்றும் சூழ்நிலை ஆதாரங்களின் நம்பகத்தன்மையைப் பொறுத்தே இந்த வழக்கின் இறுதித் தீர்ப்பும், உண்மையும் வெளிவரும் என்று சட்ட வல்லுநர்கள் கருதுகின்றனர்.