புதுச்சேரி சட்டப்பேரவைத் தேர்தல் வாக்கு எண்ணிக்கை விறுவிறுப்பாக நடைபெற்று வரும் சூழலில், தட்டாஞ்சாவடி தொகுதியில் போட்டியிட்ட முதல்வர் ரங்கசாமி அமோக வெற்றி பெற்றுள்ளார். கடந்த முறை ஏனாம் தொகுதியில் தோல்வியைத் தழுவிய கசப்பான அனுபவத்தால், இந்த முறை தட்டாஞ்சாவடி மற்றும் மங்கலம் என இரு தொகுதிகளில் அவர் களம் கண்டார். தட்டாஞ்சாவடியில் தன்னை எதிர்த்துப் போட்டியிட்ட காங்கிரஸ் கட்சியின் முக்கிய முகமும், முன்னாள் முதல்வருமான வைத்திலிங்கத்தை ரங்கசாமி வீழ்த்தியுள்ளார். இந்த வெற்றியின் மூலம் தனது கோட்டையை ரங்கசாமி மீண்டும் ஒருமுறை நிலைநாட்டியுள்ளார். இத்தொகுதியில் நாம் தமிழர் கட்சியின் கார்த்தி குமாரி, பாமகவின் கதிரேசன் மற்றும் தவெக கூட்டணி வேட்பாளர் விநாயகம் உள்ளிட்டோர் போட்டியிட்ட போதிலும், ரங்கசாமியின் செல்வாக்கு மக்கள் மத்தியில் அசைக்க முடியாததாக இருந்துள்ளது.
மறுபுறம், ரங்கசாமி போட்டியிடும் மற்றொரு தொகுதியான மங்கலத்திலும் கடுமையான போட்டி நிலவி வருகிறது. அங்கு காங்கிரஸ் சார்பில் ரகுபதி, திமுக சார்பில் ரங்கன் மற்றும் தமிழக வெற்றிக் கழகம் (தவெக) சார்பில் சத்யா ஆகியோர் பலப்பரீட்சை நடத்தி வருகின்றனர். மொத்தம் 30 தொகுதிகளைக் கொண்ட புதுச்சேரியில் ஆட்சியைப் பிடிக்க 16 இடங்கள் தேவை என்ற நிலையில், முதல்வரின் இந்த வெற்றி என்.ஆர். காங்கிரஸ் மற்றும் அதன் கூட்டணி கட்சிகளுக்கு பெரும் உற்சாகத்தை அளித்துள்ளது. தட்டாஞ்சாவடி வெற்றிச் செய்தியைத் தொடர்ந்து ரங்கசாமியின் ஆதரவாளர்கள் புதுச்சேரி வீதிகளில் பட்டாசு வெடித்தும் இனிப்புகள் வழங்கியும் கொண்டாடி வருகின்றனர். ரங்கசாமியின் இந்த அரசியல் நகர்வு மற்றும் வெற்றி, புதுச்சேரி தேர்தல் முடிவுகளில் ஒரு முக்கிய திருப்புமுனையாகக் கருதப்படுகிறது.