தனியார் துறை ஊழியர்களின் எதிர்கால நலனைக் கருத்தில் கொண்டு, ஊழியர் வருங்கால வைப்பு நிதி (EPF) திட்டத்தில் மிக முக்கியமான மாற்றங்களைக் கொண்டு வர மத்திய அரசு திட்டமிட்டுள்ளது. குறிப்பாக, தற்போது 15,000 ரூபாயாக இருக்கும் இபிஎஃப் கட்டாய ஊதிய உச்சவரம்பை 25,000 ரூபாயாக உயர்த்த வருங்கால வைப்பு நிதி நிறுவனம் பரிசீலித்து வருகிறது. கடந்த 2014-ம் ஆண்டுக்கு பிறகு சுமார் 10 ஆண்டுகளாக இந்த உச்சவரம்பில் மாற்றம் ஏதும் செய்யப்படாத நிலையில், தற்போதைய விலைவாசி உயர்வு மற்றும் ஊதிய மாற்றங்களுக்கு ஏற்ப இந்த அதிரடி நடவடிக்கை எடுக்கப்பட உள்ளது.
இந்த ஊதிய உச்சவரம்பு உயர்வு அமலுக்கு வரும் பட்சத்தில், ஊழியர்களின் மாதந்திர பிஎஃப் பங்களிப்புத் தொகை அதிகரிப்பதோடு, நிறுவனங்களின் பங்களிப்பும் கணிசமாக உயரும். இதன் மூலம் ஊழியர்கள் ஓய்வுபெறும் போது அவர்களுக்குக் கிடைக்கும் மொத்தத் தொகை மற்றும் மாதாந்திர ஓய்வூதியம் (Pension) ஆகிய இரண்டும் பெருமளவில் அதிகரிக்க வாய்ப்புள்ளது. குறிப்பாக, நடுத்தர வருவாய் பிரிவைச் சேர்ந்த லட்சக்கணக்கான தனியார் துறை ஊழியர்களுக்கு இது ஒரு சிறந்த நிதி பாதுகாப்பை வழங்கும் என்று எதிர்பார்க்கப்படுகிறது.
இது ஒருபுறமிருக்க, இபிஎஃப் நிறுவனம் தனது சேவைகளை முழுமையாக டிஜிட்டல் மயமாக்கி வருகிறது. இனி ஊழியர்கள் தங்களின் ஓய்வூதிய பலன்கள் மற்றும் சேமிப்புத் தொகையைப் பெற அலுவலகங்களுக்கு நேரில் செல்ல வேண்டிய அவசியம் இன்றி, ஆன்லைன் மூலமாகவே எளிதாக விண்ணப்பித்துப் பெற்றுக் கொள்ளலாம். மேலும், இபிஎஃப் கணக்கைப் பயன்படுத்தி எல்ஐசி காப்பீட்டு பிரீமியம் செலுத்துவது மற்றும் ஏடிஎம் வசதிகள் போன்ற நவீன சேவைகளும் அறிமுகப்படுத்தப்பட்டு வருவதால், சந்தாதாரர்கள் தங்களின் கணக்கை மிகவும் எளிமையாகவும் வெளிப்படையாகவும் நிர்வகிக்க வழிவகை செய்யப்பட்டுள்ளது.