மூன்று நாட்கள் விடுமுறைக்கு பிறகு மீண்டும் கூடிய தமிழக சட்டசபையில், இன்று காவல் துறை மானியக் கோரிக்கை மீதான விவாதம் நடைபெற்றது. இந்த விவாதத்திற்குப் பதிலளித்துப் பேசிய தமிழக முதல்வர் விஜய், “பெண்கள் குறித்து சமூக வலைதளங்களிலோ அல்லது பொது வெளியிலோ யாராவது அவதூறாகப் பேசினால், அவர்கள் எந்தக் கட்சியைச் சேர்ந்தவராக இருந்தாலும் சட்டம் தன் கடமையைச் செய்யும். குற்றவாளிகள் விஷயத்தில் எந்தவிதப் பாகுபாடும் காட்டப்படாது; சட்டத்தின் முன் அனைவரும் சமம் என்பதே இந்த அரசின் உறுதியான நிலைப்பாடு” எனத் தெரிவித்தார்.
முதல்வரின் இந்த அறிவிப்பிற்கு தேமுதிக தலைவரும் சட்டமன்ற உறுப்பினருமான பிரேமலதா விஜயகாந்த் உடனடியாகத் தன் வரவேற்பைத் தெரிவித்தார். அவையில் பேசிய அவர், “ஒட்டுமொத்த பெண்களின் பாதுகாப்பையும் உறுதிசெய்யும் வகையில் முதல்வர் பேசியிருப்பதை ஒரு பெண் தலைவராக நான் மனதார வரவேற்கிறேன். அதேவேளையில், சோஷியல் மீடியாக்களில் பெண் தலைவர்களைக் கொச்சையாகப் பதிவிடுபவர்களில் தவெகவினரும் இருக்கிறார்கள் என்பதால், முதல்வர் தனது சொந்தக் கட்சியினரையும் இதற்காகக் கண்டிக்க வேண்டும்” எனக் கோரிக்கை வைத்தார்.
பிரேமலதாவின் கோரிக்கைக்குப் பதிலளித்துப் பேசிய சட்டத்துறை அமைச்சர் நிர்மல் குமார், “முதல்வர் குறிப்பிட்டது தன் சொந்தக் கட்சியினரையும் சேர்த்துதான். பெண்கள் விஷயத்தில் தவறு செய்பவர்கள் யாராக இருந்தாலும் கட்சி பாகுபாடின்றி நடவடிக்கை எடுக்கப்படும் என்பதுதான் அரசின் கொள்கை. உண்மையில், திமுகவினர்தான் எங்கள் கட்சியின் பெயரில் ‘ஃபேக் ஐடி’ (Fake ID) உருவாக்கி, கடந்த 10 ஆண்டுகளாக இதுபோன்ற அவதூறுகளைப் பரப்பி வருகிறார்கள். அன்று கேப்டன் விஜயகாந்திற்கு என்னென்ன சங்கடங்களைக் கொடுத்தார்களோ, அதையேதான் இப்போதும் செய்கிறார்கள்” என்று குற்றம்சாட்டினார்.
இதனைத் தொடர்ந்து தவெக பொதுச்செயலாளர் புஸ்சி ஆனந்த் எழுந்து நின்று, “பெண்கள் குறித்து அவதூறாகப் பேசியதாகவோ அல்லது தவறாக நடந்துகொண்டதாகவோ எங்கள் கட்சியினர் மீது புகார் எழுந்தால், அவர்களை உடனடியாகக் கட்சியை விட்டே நீக்கியிருக்கிறோம். பெண்கள் பாதுகாப்பில் எங்கள் கட்சி என்றென்றும் உறுதியாக இருக்கும்” என்று விளக்கமளித்தார். இந்த விவாதத்தைத் தொடர்ந்து சட்டசபையில் காவல் துறை மானியக் கோரிக்கை மீதான நடவடிக்கைகள் தொடர்ந்து நடைபெற்றன.