தமிழக வெற்றி கழக பொதுக்கூட்டத்திற்கு அனுமதி மறுப்பு…. பிரேமலதா விஜயகாந்த் கூறிய பதில்…!!

தேமுதிக பொதுச்செயலாளர் பிரேமலதா விஜயகாந்த், தமிழகத்தில் நிலவும் சட்டம்-ஒழுங்கு பிரச்சினைகள், பெண்கள் பாதுகாப்பின்மை மற்றும் போதைப்பொருள் பரவல் போன்ற முக்கியப் பிரச்சினைகளைக் கடுமையாகச் சுட்டிக்காட்டி, திமுக அரசு கேள்விக்குறியான ஆட்சியை நடத்துவதாக விமர்சித்துள்ளார்.

அவர் அறிவித்துள்ள, ஜனவரி 9ஆம் தேதி கடலூரில் நடைபெறவுள்ள “மக்கள் உரிமை மீட்பு மாநாடு 2.0” ஆனது, நன்றியை மறந்தவர்களுக்கும், துரோகம் செய்தவர்களுக்கும், மக்கள் நலனைப் புறக்கணித்தவர்களுக்கும் தக்க பாடம் புகட்டும் மாநாடாக அமையும் என்று உறுதி கூறியுள்ளார். அரசியல் வட்டாரத்தில் இது திமுக ஆட்சியை நேரடியாக இலக்கு வைத்துப் பேசப்பட்டதாகக் கருதப்படுகிறது.

இதற்கிடையில், தமிழக வெற்றிக் கழகத்தின் தலைவர் விஜய்க்குச் சேலத்தில் டிசம்பர் 4ஆம் தேதி பிரச்சார அனுமதி மறுக்கப்பட்டதைக் குறித்து அவர் கருத்து தெரிவித்தார். டிசம்பர் 6 பாபர் மசூதி இடிப்பு நினைவு தினம் என்பதால், வேறு தேதி குறிப்பிடுமாறு காவல்துறை வலியுறுத்தியுள்ளது. மாற்று தேதி கொடுத்தால், விஜயின் பிரச்சாரத்திற்கு எந்தச் சிக்கலும் இருக்காது என்றும் அவர் கூறியுள்ளார்.

முன்னதாக, காரைக்குடியில் பிரேமலதா பேசிய “நேற்று முளைத்த காளான் எடுபடாது” என்ற கருத்து விஜயைக் குறிப்பதாகச் சமூக வலைதளங்களில் எழுந்த சர்ச்சைக்கு அவர் விளக்கம் அளித்துள்ளார். “நான் விஜயை அப்படிச் சொல்லவில்லை. விஜய் எங்கள் வீட்டுப் பிள்ளைதான். சினிமா கலைஞர்கள் அரசியலுக்கு வருவதை நாங்கள் எப்போதும் எதிர்த்ததில்லை.

விஜயகாந்தும் விஜயும் 17 படங்களில் இணைந்து நடித்தவர்கள். அரசியலிலும் விஜய் வெற்றி பெற வாழ்த்துகிறேன்” என்று அவர் விளக்கம் அளித்தது, தேமுதிக மற்றும் தவெக இடையே கூட்டணி வாய்ப்புகள் இருக்கிறதோ என்ற கேள்விகளை எழுப்பியுள்ளது.