திருவனந்தபுரத்தில் திமுக தரப்புடன் தேமுதிக பொதுச்செயலாளர் பிரேமலதா விஜயகாந்த் ரகசியமாக கூட்டணி பேச்சுவார்த்தை நடத்தியதாக வெளியாகி இருக்கும் தகவல் அரசியல் வட்டாரத்தில் பெரும் பரபரப்பை ஏற்படுத்தியுள்ளது. இந்தச் சந்திப்பின் போது, தேமுதிக தரப்பில் 8 மக்களவைத் தொகுதிகள் மற்றும் ஒரு ராஜ்யசபா எம்பி பதவி கோரப்பட்டதாகக் கூறப்படுகிறது. “எங்களுக்கு உரிய மரியாதை கொடுக்கும் கட்சியுடன்தான் கூட்டணி” என்று பிரேமலதா பகிரங்கமாக அறிவித்திருந்தாலும், திரைமறைவில் திமுக தலைமையிடம் தூது விட்டிருப்பது அக்கட்சியின் இரட்டை நிலைப்பாட்டைக் காட்டுவதாக அரசியல் விமர்சகர்கள் கருதுகின்றனர்.
இருப்பினும், கூட்டணி முடிவை அறிவிப்பதற்கான தேதியைத் தொடர்ந்து தள்ளிப்போட்டு வருவது தேமுதிக தொண்டர்களிடையே கடும் அதிருப்தியை ஏற்படுத்தியுள்ளது. தேர்தல் களம் சூடுபிடித்துள்ள நிலையில், மற்ற கட்சிகள் பிரச்சாரத்தைத் தொடங்கிவிட்டன. ஆனால், தேமுதிக தலைமை இன்னும் ஒரு தெளிவான முடிவை எடுக்காமல் இழுபறி நிலையில் இருப்பதால், களப்பணியில் ஈடுபட முடியாமல் அக்கட்சியினர் குழப்பத்தில் ஆழ்ந்துள்ளனர். இந்தத் தாமதம் கட்சியின் வெற்றி வாய்ப்பைப் பாதிக்கும் என்ற கவலை ஒருபுறம் இருக்க, தலைமை மீது இருந்த நம்பிக்கையும் மெல்லக் குறைந்து வருவதாக உடன்பிறப்புகள் முணுமுணுக்கத் தொடங்கியுள்ளனர்.