தமிழக வெற்றிக் கழகத்தின் (தவெக) தலைவர் விஜய், அடுத்தகட்டமாக சேலம் அல்லது தருமபுரியில் பிரம்மாண்டமான மக்கள் சந்திப்பு நிகழ்வை நடத்தத் திட்டமிட்டுள்ளார். இந்த நிகழ்வின் போது கட்சியின் தேர்தல் சின்னம் குறித்த முக்கிய அறிவிப்புகள் வெளியாகலாம் என எதிர்பார்க்கப்படும் நிலையில், தவெக தனது கூட்டணிப் பேச்சுவார்த்தைகளையும் ரகசியமாகத் தொடங்கியுள்ளதாகத் தகவல்கள் கசிந்துள்ளன.
குறிப்பாக, தேமுதிக, அமமுக மற்றும் புதிய தமிழகம் ஆகிய கட்சிகளுடன் தவெக முதற்கட்டப் பேச்சுவார்த்தைகளை நடத்தி வருவதாகக் கூறப்படுகிறது. இந்தத் தகவல் உறுதியாகும் பட்சத்தில், விஜய், பிரேமலதா விஜயகாந்த், டிடிவி தினகரன் மற்றும் டாக்டர் கிருஷ்ணசாமி ஆகிய நால்வரும் ஒரே மேடையில் தோன்றித் தங்களது கூட்டணியை அதிகாரப்பூர்வமாக அறிவிக்க வாய்ப்புள்ளதாக அரசியல் வட்டாரங்கள் தெரிவிக்கின்றன. இது 2026 சட்டமன்றத் தேர்தல் களத்தில் ஒரு புதிய திருப்பத்தை ஏற்படுத்தும் எனப் பார்க்கப்படுகிறது.