நவி மும்பை ஐரோலியில் உள்ள ரஜமாதா ஜிஜாவ் மாநகராட்சி மருத்துவமனையில், தவறான ஊசி செலுத்தப்பட்டதாகக் கூறப்படும் புகாரில் 8 மாத கர்ப்பிணியும் அவரது வயிற்றில் இருந்த குழந்தையும் பரிதாபமாக உயிரிழந்தனர். சோனம் டோங்ரே (23) என்ற அந்தப் பெண்மணிக்கு, ஜூலை 1 அன்று பிரசவத்திற்கு முந்தைய வழக்கமான ஊசி போடப்பட்ட சிறிது நேரத்திலேயே உடல்நிலை மோசமடைந்துள்ளது. அதே நாளில், ரிச்சா மிஸ்ரா என்ற மற்றொரு 8 மாத கர்ப்பிணிக்கும் இதேபோன்ற ஊசிகள் செலுத்தப்பட்ட நிலையில், அவரும் ஆபத்தான கட்டத்தை எட்டி வாஷியில் உள்ள போர்டிஸ் மருத்துவமனைக்கு அவசர சிகிச்சைக்காக மாற்றப்பட்டார். தற்போது ரிச்சாவின் உடல்நிலை சீராக உள்ளதாக மருத்துவர்கள் தெரிவித்துள்ளனர்.
பாதிக்கப்பட்ட சோனமின் கணவர் கரண் டோங்ரே, தனது மனைவியின் மரணத்திற்கு மருத்துவமனை ஊழியர்களின் அலட்சியமே காரணம் என்று குற்றம் சாட்டியுள்ளார். ஊசி போட்ட பிறகு மனைவியின் உடல்நிலை மோசமடைந்த போதிலும், அங்குள்ள மருத்துவர்கள் சுமார் மூன்று மணி நேரம் எந்தவொரு மேல் சிகிச்சைக்கும் அனுப்பாமல் காலதாமதம் செய்ததாகக் குறிப்பிட்டுள்ளார். மேலும், நிலைமை கையை மீறிச் சென்ற பிறகே வாஷியில் உள்ள நவி மும்பை மாநகராட்சி மருத்துவமனைக்கு மாற்றியதாகவும், அங்கு அவர் சிகிச்சை பலனின்றி உயிரிழந்ததாகவும் வேதனையுடன் தெரிவித்துள்ளார்.
இதுகுறித்து நவி மும்பை மாநகராட்சி சுகாதார மருத்துவ அதிகாரி டாக்டர் ராஜேஷ் ம्हाத்ரே கூறுகையில், குறைப்பிரசவ அறிகுறியால் அனுமதிக்கப்பட்ட சோனமிற்கு, குழந்தையின் நுரையீரல் வளர்ச்சிக்காக ‘டெக்ஸாமெதாசோன்’ என்ற ஸ்டீராய்டு ஊசி செலுத்தப்பட்டதாகக் குறிப்பிட்டார். அதன் பின்னரே அவர் மயக்கமடைந்துள்ளார். மற்றொரு நோயாளி ரிச்சாவிற்கு டெக்ஸாமெதாசோனுடன், பிரசவ வலியைத் தள்ளிப்போட உதவும் ‘டுவாடிலான்’ ஊசியும் போடப்பட்டுள்ளது. இந்த விவகாரம் பெரும் சர்ச்சையை ஏற்படுத்தியதை அடுத்து, சம்பந்தப்பட்ட இரண்டு மருந்துகளின் பயன்பாடும் உடனடியாக நிறுத்தப்பட்டு, அந்த முழுத் தொகுதி மருந்துகளும் சீல் வைக்கப்பட்டு உணவு மற்றும் மருந்து நிர்வாகத் துறைக்கு (FDA) சோதனைக்காக அனுப்பப்பட்டுள்ளன.
இந்தச் சம்பவத்தால் ஏற்பட்ட அரசியல் கட்சிகளின் தொடர் போராட்டங்களை அடுத்து, நவி மும்பை மாநகராட்சி ஆணையர் டாக்டர் கைலாஸ் ஷிண்டே அதிரடி உத்தரவுகளைப் பிறப்பித்துள்ளார். ஐரோலி மருத்துவமனையின் மகப்பேறு மருத்துவர் டாக்டர் பாவனா பாகரேவை ‘பணி அலட்சியத்திற்காக’ உடனடியாகப் பணியிடை நீக்கம் செய்துள்ளார். மேலும், தானே மாவட்ட அறுவை சிகிச்சை நிபுணர் தலைமையில், அரசு ஜே.ஜே மருத்துவமனை மருத்துவர்கள் மற்றும் மகப்பேறியல் சங்க உறுப்பினர்கள் அடங்கிய உயர்மட்டக் குழு அமைக்கப்பட்டுள்ளது. இந்த விவகாரம் குறித்து முழுமையாக விசாரித்து 15 நாட்களுக்குள் அறிக்கை சமர்ப்பிக்க இக்குழுவிற்கு உத்தரவிடப்பட்டுள்ளது.