ராமநாதபுரம் மாவட்டம் பரமக்குடியில் பாதுகாப்பு பணியில் ஈடுபட்டிருந்த பெண் காவலர்களைக் கழிவறையில் ரகசிய கேமரா வைத்து ஆபாசமாக வீடியோ எடுத்த சிறப்பு உதவி ஆய்வாளர் (SSI) கைது செய்யப்பட்ட சம்பவம் பெரும் பரபரப்பை ஏற்படுத்தியுள்ளது. தியாகி இமானுவேல் சேகரன் நினைவு தின பாதுகாப்பு பணிக்காகப் பல்வேறு மாவட்டங்களிலிருந்து பெண் போலீசார் வந்திருந்த நிலையில், மணி நகர் சோதனைச் சாவடியில் உள்ள கழிவறையில் கருப்பு நிறப் கவரால் சுற்றப்பட்ட செல்போன் ஒன்று வீடியோ பதிவுடன் மறைத்து வைக்கப்பட்டிருந்தது கண்டுபிடிக்கப்பட்டது. இதனைப் பார்த்த பெண் காவலர் அதிர்ச்சியடைந்து உயர் அதிகாரிகளிடம் புகார் அளித்தார்.
முதற்கட்ட விசாரணையில், அந்த செல்போன் பரமக்குடி நகர் காவல் நிலையத்தில் பணியாற்றி வரும் முத்துப்பாண்டி (58) என்பவருடையது என்பது உறுதி செய்யப்பட்டது. இதனைத் தொடர்ந்து அவர் மீது வழக்குப் பதிவு செய்த போலீசார் அவரை உடனடியாகக் கைது செய்தனர். முத்துப்பாண்டி ஏற்கனவே கடந்த நான்கு ஆண்டுகளுக்கு முன்பு சக பெண் போலீசாருக்குக் கேக் ஊட்டிய சர்ச்சையில் சிக்கி இடமாற்றம் செய்யப்பட்டவர் என்பதும், தற்போது மீண்டும் இது போன்ற கீழ்த்தரமான செயலில் ஈடுபட்டு கைதாகி இருப்பதும் காவல்துறையினரிடையே பெரும் அதிர்ச்சியை ஏற்படுத்தியுள்ளது.