தமிழக சட்டமன்றத் தேர்தல் நெருங்கி வரும் வேளையில், பாட்டாளி மக்கள் கட்சியில் தந்தை மற்றும் மகனுக்கு இடையே ஏற்பட்டுள்ள அரசியல் முரண்பாடு பெரும் பரபரப்பை ஏற்படுத்தியுள்ளது. கடந்த ஒன்றரை ஆண்டுகளுக்கும் மேலாகவே ராமதாஸ் மற்றும் அன்புமணி ராமதாஸ் ஆகியோரிடையே கருத்து வேறுபாடுகள் நிலவி வந்த நிலையில், தற்போது அது உச்சகட்டத்தை எட்டியுள்ளது. குறிப்பாக, அதிமுக-பாஜக கூட்டணியில் அன்புமணி இணைந்திருப்பதை ராமதாஸ் தரப்பு ஏற்காததே இந்த விரிசலுக்கு முக்கியக் காரணமாகச் சொல்லப்படுகிறது.
தற்போது அன்புமணி ராமதாஸ் தலைமையிலான அணி அதிமுக கூட்டணியில் ஐக்கியமாகியுள்ளது. இக்கூட்டணியில் அவருக்கு 18 முதல் 20 தொகுதிகள் வரை ஒதுக்கப்படலாம் என்றும், ஏற்கனவே அவருக்கு மாநிலங்களவை உறுப்பினர் பதவி வழங்கப்பட்டுள்ளதால் அவர் தரப்பு உறுதியாக இருப்பதாகவும் தெரிகிறது. ஆனால், ராமதாஸ் தரப்போ முதலில் திமுக கூட்டணியை நாடியதாகவும், அங்கு விடுதலை சிறுத்தைகள் கட்சியின் எதிர்ப்பால் இடம் கிடைக்காததால் மீண்டும் அதிமுக கதவைத் தட்டியதாகவும் தகவல்கள் தெரிவிக்கின்றன.
இந்தச் சூழலில், ராமதாஸுடன் மீண்டும் இணைவதற்கோ அல்லது பேச்சுவார்த்தை நடத்துவதற்கோ வாய்ப்பே இல்லை என அன்புமணி தரப்பு திட்டவட்டமாகத் தெரிவித்துவிட்டது. இருவரையும் ஒன்றிணைக்க பாஜக மேலிடம் எடுத்த சமரச முயற்சிகளும் தோல்வியில் முடிந்துள்ளன. மேலும், அதிமுக பொதுச்செயலாளர் எடப்பாடி பழனிசாமியும் ராமதாஸ் தரப்பைச் சேர்த்துக் கொள்வதில் ஆர்வம் காட்டவில்லை எனக் கூறப்படுகிறது. இதனால் ராமதாஸ் தரப்பு அரசியல் ரீதியாகத் தனித்து விடப்படும் சூழல் உருவாகியுள்ளது.
தேர்தல் ஆணையத்தின் அங்கீகாரம், கட்சிப் பெயர் மற்றும் சின்னம் ஆகியவை அன்புமணி வசமே இருப்பதால், பெரும்பாலான நிர்வாகிகள் அவர் பக்கமே நிற்கின்றனர். மறுபுறம் ராமதாஸ் தரப்பில் இருப்பவர்கள், அவர் இன்னும் செல்வாக்குடன் இருப்பதாகக் கூறினாலும், தற்போதைய நிலையில் அவர் ‘அரசியல் முட்டுச்சந்தில்’ நிற்பதாகவே அரசியல் ஆய்வாளர்கள் கருதுகின்றனர். வரும் தேர்தலில் பாமகவின் இந்த பிளவு வட தமிழகத்தின் வாக்கு வங்கியில் எத்தகைய மாற்றத்தை ஏற்படுத்தும் என்பதைப் பொறுத்திருந்துதான் பார்க்க வேண்டும்.