ஆந்திர மாநிலம் அனந்தபூரில் பெற்றோருக்கு இடையே ஏற்பட்ட மோதலில் 4 வயது சிறுவன் பரிதாபமாக உயிரிழந்த சம்பவம் பெரும் சோகத்தை ஏற்படுத்தியுள்ளது. அனந்தபூரில் உள்ள லக்ஷ்யம் பள்ளி கிராமத்தைச் சேர்ந்த ரமேஷ் மற்றும் அவரது மனைவி மகேஸ்வரி ஆகியோருக்கு இடையே ஏற்பட்ட குடும்பத் தகராறு, எதிர்பாராத விதமாக ஒரு கொடிய விபத்தாக முடிந்தது.
இந்தத் தம்பதியினருக்கு இடையே ஏற்பட்ட வாக்குவாதம் ஒருகட்டத்தில் முற்றி கைகலப்பாக மாறியது. இதில் ஆத்திரமடைந்த ரமேஷ், தனது மனைவியைத் தாக்குவதற்காக ஒரு கல்லை எடுத்து வீசியுள்ளார். ஆனால், எதிர்பாராதவிதமாக அந்தக் கல் குறிதவறி அருகில் இருந்த அவர்களின் 4 வயது மகனின் தலையில் பலமாகத் தாக்கியது. இதில் சிறுவன் ரத்த வெள்ளத்தில் சரிந்து விழுந்தான்.
படுகாயமடைந்த சிறுவனை உடனடியாக மீட்டு சிகிச்சைக்காக மருத்துவமனைக்கு கொண்டு சென்றனர். இருப்பினும், அங்கு சிகிச்சை பலனின்றி அந்தச் சிறுவன் பரிதாபமாக உயிரிழந்தான். தம்பதியினரின் தனிப்பட்ட மோதல் மற்றும் கோபத்தினால் ஒரு பச்சிளம் குழந்தையின் உயிர் பறிபோன இந்தச் சம்பவம் அப்பகுதி மக்களிடையே மிகுந்த அதிர்ச்சியையும் வேதனையையும் ஏற்படுத்தியுள்ளது.