விஐபிக்களின் தூக்கத்தைக் கெடுத்த விஜய்…! பரந்தூர் விமான நிலைய திட்டம்.. ரூ.27,400 கோடிக்கு செக்… ரியல் எஸ்டேட் அதிபர்கள் அதிர்ச்சி..!

சென்னைக்கு அருகேயுள்ள காஞ்சிபுரம் மாவட்டம் பரந்தூரில் அமையவிருந்த 2-வது சர்வதேச பசுமைவளாக விமான நிலையத் திட்டத்தை மாற்று இடத்திற்கு மாற்றத் தமிழக அரசு முடிவு செய்துள்ளதாகத் வெளியாகியுள்ள அதிகாரப்பூர்வ அறிவிப்பு, அங்கு நிலங்களை வாங்கிப் போட்டிருந்த விஐபிக்கள் மற்றும் பெரும் முதலீட்டாளர்களின் தூக்கத்தைக் கெடுத்துள்ளது. தமிழக வெற்றிக் கழகத்தின் தலைவரும் முதலமைச்சருமான சி. ஜோசப் விஜய் தலைமையிலான புதிய அரசு, விவசாய நிலங்களையும் நீர்நிலைகளையும் அழித்துப் பரந்தூரில் விமான நிலையம் அமைக்கப்படாது என்பதில் உறுதியாக இருக்கும் நிலைப்பாடு தற்போது ரியல் எஸ்டேட் சந்தையில் பெரும் அதிர்ச்சியை ஏற்படுத்தியுள்ளது.

கடந்த 2022-ஆம் ஆண்டு முந்தைய திமுக ஆட்சியின் போது, ₹27,400 கோடி மதிப்பீட்டில் 5,700 ஏக்கருக்கும் அதிகமான பரப்பளவில் பரந்தூர் விமான நிலையத் திட்டம் அறிவிக்கப்பட்டது. இந்த அறிவிப்பு வெளியான உடனே, சென்னை மற்றும் வெளிநாடுகளில் வசிக்கும் பெருமுதலாளிகள், அரசியல் பிரமுகர்கள் மற்றும் சினிமா விஐபிக்கள் எனப் பல தரப்பினரும் பரந்தூர், ஏகனாபுரம் மற்றும் அதன் சுற்றுவட்டாரக் கிராமங்களில் நூற்றுக்கணக்கான ஏக்கர் விவசாய நிலங்களைச் சதுர அடி கணக்கில் போட்டி போட்டுக்கொண்டு கோடிக்கணக்கில் முதலீடு செய்து ரியல் எஸ்டேட் வர்த்தகமாக வாங்கிப் போட்டனர். ஏரோசிட்டி , பெருநிறுவனங்கள் மற்றும் மெட்ரோ ரயில் இணைப்பு போன்ற உள்கட்டமைப்பு வசதிகள் வரும் என்பதால் நிலங்களின் விலை அங்கு பல மடங்கு எகிறியிருந்தது.

இருப்பினும், தங்களது வாழ்வாதாரமான விளைநிலங்களை இழக்க விரும்பாத ஏகனாபுரம் கிராம மக்கள் கடந்த பல ஆண்டுகளாகத் தொடர் போராட்டங்களை நடத்தி வந்தனர். தவெக தலைவராக இருந்த போது நேரடியாகக் களத்திற்குச் சென்று மக்களின் போராட்டத்திற்கு ஆதரவளித்த முதலமைச்சர் விஜய், தற்பொழுது ஆட்சிக் கட்டிலில் அமர்ந்ததும் தனது கொள்கை மாறாமல் இத்திட்டத்தைக் கைவிட முடிவு செய்துள்ளார். விவசாயிகளின் நலனைக் காக்கப் பரந்தூர் திட்டத்தை ரத்து செய்துவிட்டு, மாற்று இடத்தை தேர்வு செய்ய அதிகாரிகளுக்கு அரசு உத்தரவிட்டுள்ளதால், இங்கு நிலங்களை வாங்கிப் போட்டிருந்த ‘விஐபி’ முதலீட்டாளர்கள் தங்களின் முதலீடு என்னவாகும் என்று தெரியாமல் பெரும் கலக்கத்தில் ஆழ்ந்துள்ளனர்.

ஏற்கனவே பரந்தூரில் திட்டத்திற்காகக் கையகப்படுத்தப்பட்ட 1,700 ஏக்கர் நிலத்தை வீணாக்காமல், அங்கு விவசாயிகளுக்குப் பாதிப்பில்லாத வகையில் சிட்கோ தொழிற்பேட்டை போன்ற மாற்றுத் திட்டங்களைக் கொண்டுவர அரசு ஆலோசித்து வருகிறது. விமான நிலையத்தை நம்பிச் சுற்றியுள்ள பகுதிகளில் பல ஆயிரம் கோடிகளை முதலீடு செய்த வடசென்னை மற்றும் தென்சென்னை ரியல் எஸ்டேட் அதிபர்களின் கனவு தற்பொழுது முற்றிலும் முடங்கியுள்ளது. முதலமைச்சர் விஜய்யின் இந்தத் துணிச்சலான மக்கள் நல அதிரடி முடிவு, கார்ப்பரேட் மற்றும் அரசியல் விஐபிக்களுக்குப் பின்னடைவாக இருந்தாலும், அப்பகுதி எளிய விவசாயிகளிடையே பெரும் ஜாக்பாட்டாகக் கொண்டாடப்பட்டு வருகிறது.