“அவரு தலித்தே கிடையாது”….. பா. ரஞ்சித் வைத்த பகீர் குற்றச்சாட்டு… கொந்தளித்த தவெக எம்.எல்.ஏ…. கொதிக்கும் தமிழக அரசியல்….!

திரைப்பட இயக்குநர் பா. ரஞ்சித் மற்றும் தமிழக வெற்றிக் கழகத்தின் சட்டமன்ற உறுப்பினர் ரேவந்த் ஆகியோருக்கு இடையே எழுந்துள்ள அரசியல் காரசார விவாதம், தமிழக அரசியல் களத்தில் பெரும் விவாதப் பொருளாக மாறியுள்ளது. தலைநகர் டெல்லி முதல் தமிழகத்தின் பல்வேறு மாவட்டங்கள் வரை நீட் தேர்வுக்கு எதிராகப் போராட்டங்கள் தீவிரமடைந்து வரும் நிலையில், சென்னையில் நீட் எதிர்ப்புப் போராட்டக்காரர்களுக்கு ஆதரவாகவும், காவல்துறையின் அடக்குமுறையைக் கண்டித்தும் இயக்குநர் பா. ரஞ்சித் தலைமையில் ஆர்ப்பாட்டம் நடைபெற்றது. அந்த நிகழ்வில் பேசிய ரஞ்சித், தவெக அரசின் தலித் அமைச்சர்கள் குறித்துக் கடுமையான விமர்சனங்களை முன்வைத்தார்.

குறிப்பாக அமைச்சர் ராஜ்மோகன் குறித்துப் பேசிய பா. ரஞ்சித், அவர் தலித் சமூகத்தைச் சேர்ந்தவரா என்பதே எழும்பூர் தேர்தலில் போட்டியிட்ட பின்னரே தெரியவந்ததாகக் குறிப்பிட்டிருந்தார். ஒரு பட்டியலின சமூகத்தைச் சேர்ந்த ஊடகவியலாளராக இருந்தபோதிலும், இதுவரை தலித் மக்களின் எந்தப் பிரச்சினைக்கும் அவர் குரல் கொடுக்கவில்லை என்று சாடிய ரஞ்சித், “இப்படியான ஒருவர் அமைச்சரானால் என்ன, ஆகாவிட்டால் என்ன? அவரை நீங்கள் அமைச்சராக்கிக் கொள்ளுங்கள், அதனால் எங்களுக்கு எந்தப் பயனும் இல்லை” என்று தனது அதிருப்தியை வெளிப்படையாகப் பதிவு செய்தார்.

பா. ரஞ்சித்தின் இந்தத் தாக்குதலுக்குத் தவெக மதுரவாயல் எம்.எல்.ஏ ரேவந்த் தனது எக்ஸ் சமூக வலைதளப் பக்கத்தில் உடனடியாகப் பதிலடி கொடுத்துள்ளார். ஐந்து ஆண்டுகளாக அதிகாரத்தில் இருந்தவர்களைக் கேள்வி கேட்கத் துணியாதவர்கள், தற்போது திடீரெனக் குரல் எழுப்புவதாகச் சுட்டிக்காட்டிய அவர், பழைய பாணி அரசியல் முறைகள் இனி செல்லாது எனக் காட்டமாகக் குறிப்பிட்டிருந்தார். மேலும், அமைச்சர் ராஜ்மோகன் சாதியின் அடிப்படையில் நியமிக்கப்படவில்லை என்றும், அவரது தகுதி, திறன் மற்றும் அவர் மீதான நம்பிக்கையின் அடிப்படையிலேயே அவருக்கு இந்த அமைச்சரவைப் பொறுப்பு வழங்கப்பட்டது என்றும் தெளிவுபடுத்தினார்.

அடையாள அரசியலைத் தாண்டி, மக்கள் எதிர்கொள்ளும் உண்மையான பிரச்சினைகளுக்குத் தீர்வு காண்பதே தவெக அரசின் முதன்மை நோக்கம் என்று ரேவந்த் உறுதியாகத் தெரிவித்தார். “சிலர் இன்னும் மக்களைச் சாதி அடையாளங்களுக்குள் சுருக்க முயற்சிக்கிறார்கள்; ஆனால் நாங்கள் நல்லாட்சி, சம வாய்ப்பு மற்றும் திறமையான நிர்வாகத்திற்கே முன்னுரிமை அளிக்கிறோம்” என்று தெரிவித்த அவர், நியாயமான கேள்விகளைத் தவெக எப்போதும் வரவேற்கும் என்றும், பிரித்தாளும் அரசியலுக்கு உண்மைகள் மற்றும் செயல்பாடுகள் மூலமே தகுந்த பதில் அளிக்கப்படும் என்றும் தனது பதிவில் வலியுறுத்தினார்.