உக்ரைன் தலைநகர் கீவ் நகரில் கடந்த வியாழக்கிழமை ரஷ்யா நடத்திய கொடூரமான ட்ரோன் தாக்குதலில் 24 பொதுமக்கள் பரிதாபமாக உயிரிழந்தனர். மனிதநேயமற்ற இந்தத் தாக்குதல் சம்பவத்திற்கு ரஷ்யாவுக்குத் தகுந்த பதிலடி தரப்படும் என்று உக்ரைன் அதிபர் வோலோடிமிர் ஜெலன்ஸ்கி நேற்று முன்தினம் சபதம் ஏற்றிருந்தார். அவர் சூளுரைத்தபடியே, உக்ரைன் ராணுவம் ரஷ்யா மீது இதுவரை இல்லாத அளவிலான ஒரு மிகப்பெரிய நள்ளிரவு வான்வழித் தாக்குதலைத் தொடுத்துள்ளது.
ரஷ்யாவின் தலைநகர் மாஸ்கோ உட்பட சுமார் 14 பிராந்தியங்களைக் குறிவைத்து உக்ரைன் தரப்பிலிருந்து நூற்றுக்கணக்கான ஆளில்லா விமானங்கள் (ட்ரோன்கள்) ஏவப்பட்டன. நேற்று நள்ளிரவைத் தாண்டி அதிகாலை 3 மணி அளவில் நடத்தப்பட்ட இந்தத் திடீர் தாக்குதலால் ரஷ்யாவின் எல்லைப் பகுதிகள் நிலைகுலைந்தன. இந்தத் தாக்குதல் சம்பவத்தில் மாஸ்கோ பிராந்தியத்தில் மட்டும் நான்கு பொதுமக்கள் உயிரிழந்துள்ளதாக அந்தப் பிராந்திய ஆளுநர் ஆண்ட்ரே வொரோபியோவ் தனது சமூக வலைதளப் பக்கத்தில் அதிகாரப்பூர்வமாகப் பதிவிட்டுள்ளார்.
அதேசமயம், உக்ரைனின் இந்த மெகா வான்வழித் தாக்குதலைத் தங்களது அதிநவீன வான் பாதுகாப்பு அமைப்புகள் மூலம் முறியடித்துள்ளதாக ரஷ்யா தெரிவித்துள்ளது. நேற்றிரவு உக்ரைன் தரப்பிலிருந்து ஏவப்பட்ட 556 ஆளில்லா விமானங்களை நடுவானிலேயே சுட்டு வீழ்த்தி அழித்துள்ளதாக ரஷ்யப் பாதுகாப்பு அமைச்சகம் அறிக்கை வெளியிட்டுள்ளது. இந்தத் தாக்குதல் காரணமாக ரஷ்யாவின் முக்கிய நகரங்களில் பெரும் பதற்றம் நிலவுவதோடு, இரு நாடுகளுக்கும் இடையேயான போர் உச்சக்கட்டத்தை எட்டியுள்ளது.