“ஸ்டாலின் முன்னிலையில் சம்பவம் செய்த ஓபிஎஸ்”… அடுத்து மார்ச் 7-ல் மதுரையில் காத்திருக்கும் தரமான ட்விஸ்ட்…. ஆடிப்போன அதிமுக கோட்டை….!

முன்னாள் முதலமைச்சர் ஓ.பன்னீர்செல்வம் அண்மையில் திமுகவில் இணைந்ததைத் தொடர்ந்து, அவரது தலைமையில் மதுரையில் பிரம்மாண்டமான இணைப்பு விழா வரும் மார்ச் 7-ஆம் தேதி நடைபெறவுள்ளது. கடந்த பிப்ரவரி 27-ஆம் தேதி முதலமைச்சர் மு.க.ஸ்டாலின் முன்னிலையில் ஓபிஎஸ் முறைப்படி திமுகவில் இணைந்தார். அவருடன் உசிலப்பட்டி எம்.எல்.ஏ ஐயப்பன் மற்றும் ஓபிஎஸ் மகன் ரவீந்திரநாத் ஆகியோரும் அக்கட்சியில் இணைந்த நிலையில், தற்போது தென் தமிழகத்தில் தங்களது பலத்தை நிரூபிக்கும் வகையில் இந்த விழா ஏற்பாடு செய்யப்பட்டுள்ளது.

மதுரை திருமங்கலம் அருகே உள்ள ராயபாளையம் பகுதியில் இந்த இணைப்பு விழா நிகழ்ச்சி நடைபெற உள்ளது. இதற்கான முன்னேற்பாடுகள் மற்றும் பூமி பூஜை பணிகள் தீவிரமாக நடைபெற்று வருகின்றன. இந்த விழாவில் முன்னாள் முதல்வர் ஓபிஎஸ், அமைச்சர் மூர்த்தி, சட்டமன்ற உறுப்பினர் ஐயப்பன் மற்றும் ரவீந்திரநாத் ஆகியோர் நேரில் கலந்து கொண்டு பணிகளை ஆய்வு செய்தனர். இந்த விழாவானது திமுகவின் பலத்தை தென் மாவட்டங்களில் மேலும் வலுப்படுத்தும் ஒரு முக்கிய நிகழ்வாகப் பார்க்கப்படுகிறது.

செய்தியாளர்களைச் சந்தித்த ஓபிஎஸ், முதலமைச்சர் மு.க.ஸ்டாலின் அனைவரையும் அரவணைத்துச் செல்லும் ஒரு சிறந்த தலைவராகச் செயல்பட்டு வருவதாகப் புகழ்ந்து தள்ளினார். தன்னைத் தாய் உள்ளத்தோடு திமுக வரவேற்றதாக நெகிழ்ச்சியுடன் குறிப்பிட்ட அவர், தமிழக மக்கள் அனைவரும் தார்மீக அடிப்படையில் இந்த ஆட்சிக்கு ஆதரவு அளித்து வருவதாகத் தெரிவித்தார். மேலும், வரும் சட்டமன்றத் தேர்தலில் முதலமைச்சர் தலைமையிலான கூட்டணி மகத்தான வெற்றி பெறும் என்றும் அவர் நம்பிக்கை தெரிவித்தார்.

இந்த இணைப்பு விழாவில் சுமார் ஒரு லட்சத்திற்கும் மேற்பட்டோர் திமுகவில் இணைய உள்ளதாக ஓபிஎஸ் தெரிவித்துள்ளார். குறிப்பாக அதிமுகவில் உள்ள 70 முதல் 80 சதவீதத் தொண்டர்கள் திமுகவில் இணையக் கூடிய நல்ல சூழல் நிலவுவதாக அவர் கூறினார். மார்ச் 7-ஆம் தேதி நடைபெறவுள்ள இந்த பிரம்மாண்ட விழாவானது தமிழக அரசியலில், குறிப்பாக தென் தமிழக அரசியல் களத்தில் ஒரு புதிய திருப்பத்தை ஏற்படுத்தும் என எதிர்பார்க்கப்படுகிறது.