தமிழகப் பத்திரப்பதிவு துறையில் அதிரடி டிஜிட்டல் புரட்சி: ஆகஸ்ட் 17 முதல் ஆன்லைன் பத்திரப்பதிவு முறை அமல்!
தமிழகப் பத்திரப்பதிவு துறையை நவீனப்படுத்தி எளிமைப்படுத்தும் நோக்கில், ஆன்லைன் மூலமாக பத்திரப்பதிவு செய்யும் புதிய நடைமுறை வரும் ஆகஸ்ட் 17-ஆம் தேதி முதல் அதிகாரப்பூர்வமாக செயல்பாட்டுக்கு வரவுள்ளது. பொதுமக்கள் நீண்ட நேரம் வரிசையில் காத்துக்கிடப்பதையும், அலைந்து திரிவதையும் தவிர்க்கும் பொருட்டு, தமிழக வெற்றி கழக அரசு இத்திட்டத்தை வகுத்துள்ளது என்று வணிகவரி மற்றும் பதிவுத்துறை அமைச்சர் லோகேஷ் தமிழ்ச்செல்வம் தெரிவித்துள்ளார். முதன்முறையாக நிலம், வீடு வாங்குபவர்களுக்கும் மற்றும் அவற்றை விற்பவர்களுக்கும் பெரும் நிம்மதியளிக்கும் இத்திட்டத்துடன் சேர்த்து, ‘எந்த பதிவாளர் அலுவலகத்திலும் பதிவு செய்யும்’ (Anywhere Registration) முறையும் அன்றைய தினமே அமலுக்கு வருகிறது. இத்திட்டம் முழுமையாக நடைமுறைக்கு வரும்போது, பொதுமக்கள் பத்திரப்பதிவு அலுவலகங்களுக்கு நேரடியாகச் செல்லாமலேயே தங்களின் வீடுகளில் இருந்தபடியே முறைப்படி பத்திரப்பதிவை எளிதாக முடித்துவிட முடியும் என்பது குறிப்பிடத்தக்கது.
தவெக அரசின் இந்த அதிரடி டிஜிட்டல் சீர்திருத்தம், நிர்வாகத் திறனை மேம்படுத்துவதோடு மட்டுமல்லாமல், பொதுமக்களின் அன்றாடப் பேராட்டங்களுக்கும் முற்றுப்புள்ளி வைப்பதாக அமைந்துள்ளது. காலங்காலமாக பத்திரப்பதிவு துறையில் நீடித்து வரும் தரகர்களின் தலையீட்டையும், முறையற்ற லஞ்ச ஊழல்களையும் வேரோடு ஒழிக்க இப்புதிய ஆன்லைன் முறை வழிவகுக்கும் என்பதால் பொதுமக்கள் மத்தியில் இதற்கு பெரும் வரவேற்பு கிடைத்துள்ளது. வெளிப்படைத்தன்மையுடனும், அதிவேகமாகவும் செயல்படவுள்ள இந்த டிஜிட்டல் கட்டமைப்பு, தமிழக அரசின் நிர்வாகச் சீர்திருத்த வரலாற்றில் ஒரு மிகமுக்கியமான மைல்கல்லாகப் பார்க்கப்படுகிறது.