“18 மில்லியன் சதுர அடி.. ஒரே நேரத்தில் 41 IT பூங்காக்கள்”… கோவையைப் பார்த்து மிரளும் பன்னாட்டு நிறுவனங்கள்… தமிழ்நாட்டு இளைஞர்களுக்கு இனி கொண்டாட்டம்தான்…!

தமிழகத்தின் ‘தொழில்துறை தலைநகரம்’ என்று பெருமையுடன் அழைக்கப்படும் கோயம்புத்தூர், தற்போது பன்னாட்டு தகவல் தொழில்நுட்ப (IT) நிறுவனங்களின் மிக முக்கிய முதலீட்டு மையமாக உருவெடுத்து வருகிறது. சென்னையைத் தாண்டி வெளிநாட்டு நிறுவனங்களுக்கு (MNCs) மிகவும் விருப்பமான இடமாக கோவை மாநகரம் மாறியுள்ளது. இதற்குச் சான்றாக, கோவையில் தற்போது 41 புதிய ஐடி பூங்காக்களும், சுமார் 18 மில்லியன் சதுர அடி பரப்பளவிலான பிரம்மாண்ட வணிக இடங்களும் (Commercial Space) அதிவேகமாக உருவாகி வருகின்றன. இந்த உள்கட்டமைப்பு வளர்ச்சியில் பங்கு வகிக்க திட்டமிட்டு, அமெரிக்காவைச் சேர்ந்த முன்னணி மென்பொருள் நிறுவனமான ‘எக்ஸீயோ’ (Exzeo Group, Inc.) கோவையில் கால்பதித்துள்ளது.

அமெரிக்காவின் புளோரிடா மாகாணம், தம்பா நகரைத் தலைமையிடமாகக் கொண்டு செயல்படும் எக்ஸீயோ நிறுவனம், கோயம்புத்தூரில் உள்ள ‘ஃபிளிக்சோ ஸ்பேசஸ்’ (Fliqzo Spaces) வளாகத்தில் தனது புதிய அதிநவீன அலுவலகத்தைத் திறந்துள்ளதாக அதிகாரப்பூர்வமாக அறிவித்துள்ளது. உத்தரப் பிரதேச மாநிலம் நொய்டாவைத் தொடர்ந்து, இந்தியாவில் இந்நிறுவனம் அமைக்கும் இரண்டாவது பெரிய தொழில்நுட்ப மையம் இது என்பது குறிப்பிடத்தக்கது. நியூயார்க் பங்குச் சந்தையில் (NYSE: XZO) பட்டியலிடப்பட்டுள்ள இந்த நிறுவனம், சொத்து மற்றும் விபத்துக் காப்பீட்டுத் துறைக்கான (P&C Insurance) ‘இன்சூரன்ஸ்-அஸ்-ஏ-சர்வீஸ்’ (IaaS) என்ற பிரத்யேக மென்பொருள் தொழில்நுட்பத் தளத்தை உலகளவில் வழங்கி வருகிறது.

கடந்த 2012ஆம் ஆண்டு வீட்டு காப்பீட்டு நிறுவனமான ‘எச்சிஐ குரூப்’ (HCI Group, Inc.) இன் தொழில்நுட்ப மற்றும் கண்டுபிடிப்புப் பிரிவாக இந்த நிறுவனம் முதன்முதலில் தொடங்கப்பட்டது. தொடக்கத்தில் ‘டைப்டேப் இன்சூரன்ஸ் குரூப்’ (TypTap Insurance Group, Inc.) என்ற பெயரில் இயங்கி வந்த இந்நிறுவனம், பின்னர் முறையாக ‘எக்ஸீயோ குரூப்’ என மறுபெயரிடப்பட்டது. இதன் தொடர்ச்சியாக, கடந்த 2025 நவம்பர் மாதத்தில் அமெரிக்காவின் நியூயார்க் பங்குச் சந்தையில் பொதுப் பங்குகளை வெளியிட்டு (IPO) பொது நிறுவனமாக மாறியது. பரேஷ் படேல் அவர்களின் தலைமையில் இயங்கி வரும் இந்நிறுவனம், உலகளாவிய பொருளாதார மந்தநிலைக்கு மத்தியிலும், 2026ஆம் ஆண்டின் முதல் காலாண்டில் (Q1 2026) மட்டும் 56 மில்லியன் டாலர் ஒட்டுமொத்த வருவாயை ஈட்டி சாதனை படைத்துள்ளது.

கோயம்புத்தூரில் தற்போது ஒரே நேரத்தில் 41 புதிய ஐடி பூங்காக்கள் மற்றும் 18 மில்லியன் சதுர அடி வணிக இடங்கள் கட்டுமானத்தில் உள்ள சூழலில், எக்ஸீயோ போன்ற உலகத்தரம் வாய்ந்த கடன் இல்லாத அமெரிக்க நிறுவனங்கள் நேரடியாகக் கோவையில் தங்களின் செயல்பாடுகளைத் தொடங்குவது தமிழகத்தின் பொருளாதார வளர்ச்சிக்கு ஒரு புதிய பலத்தை கொடுத்துள்ளது. கோவையின் திறமையான இளைஞர்களுக்குப் புதிய வேலைவாய்ப்புகளை உருவாக்குவதுடன், உலகளாவிய தொழில்நுட்ப வரைபடத்தில் கோவை நகரை அடுத்த கட்டத்திற்கு இந்த வளர்ச்சி எடுத்துச் செல்லும் என எதிர்பார்க்கப்படுகிறது.