“விஜய் அரசுக்கு ஆபத்து?”…. கோப்புகளை நகர்த்தாமல் முடக்கும் அதிகாரிகள்….. வைகோ போட்ட குண்டு… அரசியலில் அடுத்த பரபரப்பு….!

தமிழகத்தில் நடைபெற்ற சட்டப்பேரவைத் தேர்தலில் வெற்றி பெற்ற தமிழக வெற்றிக் கழகம் , ஆட்சியமைப்பதற்கான தனிப்பெரும்பான்மை கிடைக்காத நிலையில், காங்கிரஸ், விசிக, ஐயுஎம்எல், சிபிஐ, சிபிஎம் மற்றும் மதிமுக ஆகிய கூட்டணிக் கட்சிகளின் ஆதரவுடன் ஆட்சியை அமைத்துள்ளது. முதலமைச்சராகப் பொறுப்பேற்றுள்ள விஜய்யின் நிர்வாகத் திறமையையும், ஊழலற்ற ஆட்சியை வழங்க அவர் எடுத்து வரும் நடவடிக்கைகளையும் மதிமுக பொதுச்செயலாளர் வைகோ தொடர்ந்து பாராட்டி வருகிறார். இந்நிலையில், தூத்துக்குடியில் நடைபெற்ற ஒரு திருமண விழாவில் கலந்துகொண்டு பேசிய வைகோ, தவெக அரசின் செயல்பாடுகளை முடக்குவதற்குச் சிலர் சதி செய்வதாகத் தெரிவித்தது அரசியல் வட்டாரத்தில் பெரும் பரபரப்பை ஏற்படுத்தியுள்ளது.

விழாவில் தம்பதியரை வாழ்த்திப் பேசிய வைகோ, தனது நீண்டகால அரசியல் பயணத்திலும் வாழ்க்கைப் பாதையிலும் துணைவியார் ரேணுகா தேவி வழங்கிய அசைக்க முடியாத ஆதரவை நெகிழ்ச்சியுடன் நினைவுகூர்ந்தார். “என் வாழ்நாள் சாதனை முழுவதையும் என் மனைவிக்கே சமர்ப்பிக்கிறேன்; துன்பங்கள் மற்றும் கஷ்டங்கள் நிறைந்த தருணங்களில் எந்தவித ஆடம்பர எதிர்பார்ப்பும் இன்றி எனக்கு ஊக்கமளித்தவர் அவர்,” எனக் குறிப்பிட்ட அவர், புதுமணத் தம்பதிகள் ஒருவருக்கொருவர் மனதளவில் புரிந்து கொண்டு, பெற்றோர்கள் பெருமைப்படும் வகையில் நிறைவான இல்லற வாழ்க்கையை நடத்த வேண்டும் என்று நெஞ்சார வாழ்த்தினார்.

தொடர்ந்து தற்போதைய அரசியல் சூழல் குறித்துப் பேசிய வைகோ, முதலமைச்சர் விஜய் மாநிலத்தில் ஊழலை ஒழிப்பதற்கு மிகத் தீவிரமான முயற்சிகளை மேற்கொண்டு வருவதாகக் குறிப்பிட்டார். இருப்பினும், கடந்த காலங்களில் கோடிக்கணக்கில் லஞ்சம் பெற்று வீடுகளில் பணத்தைக் குவித்து வைத்துள்ள சில ஊழல் அதிகாரிகள், இந்த அரசின் நற்பெயரைக் கெடுக்கும் நோக்கோடு செயல்படுவதாகச் சாடினார். முதலமைச்சரின் நேர்மையான ஆட்சி நிர்வாகத்திற்குத் முட்டுக்கட்டை போடும் வகையில், அரசு அலுவலகங்களில் எந்தவொரு முக்கியமான கோப்புகளையும் நகர்த்தாமல், அரசை முற்றிலும் ஸ்தம்பிக்க வைக்க அவர்கள் திட்டமிட்டுச் சதி செய்வதாகத் பகிரங்கமாகக் குற்றம் சாட்டினார்.

அரசு எந்திரத்தில் நேர்மையான அதிகாரிகளும் இருக்கத்தான் செய்கிறார்கள் என்பதைச் சுட்டிக்காட்டிய வைகோ, நிர்வாகத்தை முடக்க நினைக்கும் இத்தகைய ஊழல்வாதிகளை உடனடியாக அடையாளம் கண்டு பதவிகளிலிருந்து விடுவிக்க வேண்டும் என வலியுறுத்தினார். மேலும், அவர்களுக்குப் பதிலாக நேர்மையும் அர்ப்பணிப்பு உணர்வும் கொண்ட அதிகாரிகளுக்கு முக்கியப் பொறுப்புகளை வழங்கி, மக்கள் நலத் திட்டங்கள் தடையின்றி விரைவாகச் சென்று சேருவதை உறுதி செய்யுமாறு முதலமைச்சர் விஜய்யிடம் நேரில் வலியுறுத்தியுள்ளதாகவும் அவர் தெரிவித்தார்.