“ஷாக்… அணுமின் நிலைய ரகசியங்கள் அவுட்…!” டார்க் வெப்பில் கூடங்குளம் பைல்கள்.. பதறவைக்கும் பகீர் பின்னணி…!!

இந்தியாவின் மிகப்பெரிய அணுமின் நிலையமான கூடங்குளம் அணுமின் நிலையம் தொடர்பான சுமார் 8.58 லட்சம் ஆவணங்கள் தங்களிடம் இருப்பதாக “வேர்ல்ட் லீக்ஸ்” என்ற ஹேக்கர் குழு தெரிவித்துள்ளது பெரும் பரபரப்பை ஏற்படுத்தியுள்ளது. இதில் சுமார் 19,000 மிக முக்கியமான ஆவணங்கள் டார்க் வெப்பில் கசிந்துள்ளதாக சர்வதேச செய்தி நிறுவனமான ராய்ட்டர்ஸ் செய்தி வெளியிட்டுள்ளது. இந்த ஆவணங்களில் பொறியியல் வரைபடங்கள், உபகரண சப்ளையர் விவரங்கள், பாதுகாப்பு மதிப்பீட்டு அறிக்கைகள் மற்றும் காப்பீடு தொடர்பான 2016 முதல் 2025 வரையிலான தரவுகள் இருப்பதாகக் கூறப்பட்டாலும், இந்த ஆவணங்களின் உண்மைத்தன்மை இன்னும் முழுமையாக உறுதி செய்யப்படவில்லை.

இந்த விவகாரம் குறித்து அனில் அம்பானி தலைமையிலான ரிலையன்ஸ் குழுமம் ஒரு முக்கிய விளக்கத்தை அளித்துள்ளது. தாங்கள் தரவுகளைப் பராமரிப்பதற்காக ஒப்பந்தம் செய்திருந்த ‘யோட்டா’ நிறுவனத்தின் சர்வரில் சைபர் தாக்குதல் நடந்ததை ரிலையன்ஸ் ஒப்புக்கொண்டுள்ளது. மேலும், இந்தத் தரவு கசிவு சம்பவம் குறித்து அரசுக்கும் சம்பந்தப்பட்ட பாதுகாப்பு அதிகாரிகளுக்கும் ஏற்கனவே தகவல் தெரிவித்துவிட்டதாகவும் அந்நிறுவனம் தனது அறிக்கையில் குறிப்பிட்டுள்ளது.

நாட்டின் அணுசக்தி உற்பத்தியில் முக்கியப் பங்கு வகிக்கும் கூடங்குளம் அணுமின் நிலையத்தின் பாதுகாப்பு ஆவணங்கள் கசிந்திருப்பது தேசிய பாதுகாப்பு குறித்த பல்வேறு கேள்விகளையும் கவலைகளையும் எழுப்பியுள்ளது. என்னென்ன ஆவணங்கள் உண்மையில் கசிந்துள்ளன மற்றும் இதனால் ஏற்பட்டுள்ள பாதிப்புகள் என்ன என்பது குறித்து அதிகாரிகள் தொடர்ந்து தீவிர விசாரணை நடத்தி வருகின்றனர். வரும் நாட்களில் இது தொடர்பான கூடுதல் விவரங்கள் வெளியாகும் என எதிர்பார்க்கப்படுகிறது.