தமிழ் சினிமாவில் முதல் முதலில் பகுத்தறிவு மற்றும் முற்போக்கான கருத்துகளை தன்னுடைய நகைச்சுவை காட்சிகள் மூலம் பரப்பியவர் என் எஸ் கிருஷ்ணன். தமிழ் சினிமாவில் எம் ஜி ஆர், சிவாஜி உள்ளிட்டோர்களே மிகவும் மரியாதையாக நடத்திய நபர்களில் ஒருவர் என் எஸ் கே. நாடக மேடையில் இருந்து திரைப்படத்துக்குள் நுழைந்த அவர் அங்கும் தன்னுடைய நடிப்பால் புகழ் பெற்றார்.
முதலில் வில்லுப்பாட்டுக் கலைஞராக தனது வாழ்க்கையைத் துவங்கியவர் பின்னர் நாடக மேடைகளில் நடிக்க ஆரம்பித்து அதன்பின் சினிமாவிற்குள் நுழைந்தார். என் எஸ் கே மற்றொரு நல்ல குணம் அவரின் ஈகைதான். தமிழ் சினிமாவில் வள்ளல் என்று பெயர் பெற்ற எம் ஜி ஆருக்கு முன்னோடியாக இருந்தவர் என் எஸ் கே. தான் நடித்து சம்பாதித்த செல்வம் முழுவதையும் மற்றவர்களுக்கு உதவி செய்வதில் செலவிட்டுள்ளார். தனது வாரிசுகளுக்குக் கூட எந்த சொத்தையும் அவர் சேர்த்துவைக்கவில்லை.
#image_title
அரசியல் தளத்தில் தீவிரமாக இயங்கி வந்த பெரியார், சினிமாவையும் சினிமாக் காரர்களையும் கடுமையாக விமர்சித்தார். அவர்களைக் கூத்தாடி என்று அழைத்து அவர்களால்தான் மக்கள் மூடநம்பிக்கைகளில் மூழ்கி கிடக்கிறார்கள் என்று திட்டித் தீர்த்தார். அப்படி பட்ட பெரியாரே என் எஸ் கே அவர்களைப் பாராட்டி தன்னுடைய குடி அரசு பத்திரிக்கையில் எழுதியுள்ளார் என்றால் நம்ப முடிகிறதா? அதற்குக் காரணம் கலைவாணர் தொடர்ந்து முற்போக்கான விஷயங்களைப் பேசி வந்ததுதான்.
இப்படிப்பட்ட என் எஸ் கே அவர்களுக்குக் கடைசி காலத்தில் வாய்ப்புகள் குறைந்தது பற்றி பாடல் ஆசிரியர் வாலி வருத்தப்பட்டுள்ளார். அதில் “கடைசி காலத்தில் என் எஸ் கே வுக்கு அதிக வாய்ப்புகள் வரவில்லை. அதற்குக் காரணம் இளம் ஹீரோக்கள் அவர் மேல் வைத்திருந்த மரியாதைதான். அவர் பெரிய மனுஷன். அவர் நம்ம படத்துல இருந்தா நம்மளால செட்ல சிகரெட் கூட குடிக்க முடியாதுன்னு பலரும் அவரை தவிர்த்தார்கள். இதை என் எஸ் கே வருத்தத்தோடு என்னிடமே சொல்லியுள்ளார்” எனக் கூறியுள்ளார்.