இந்திய ரிசர்வ் வங்கி (RBI) மூலதனக் கட்டணம் தொடர்பான தனது இறுதி வழிகாட்டுதல்களில் முக்கியமான மாற்றங்களை மேற்கொண்டுள்ளது. இதன்படி, தனிநபர் கடன்களுக்கான இடர் வரம்பு (Risk Weight) ரூ.7.5 கோடியிலிருந்து ரூ.10 கோடியாக உயர்த்தப்பட்டுள்ளது. இந்த அதிரடி மாற்றத்தால், ரூ.10 கோடி வரையிலான தனிநபர் கடன்கள் இனி குறைந்த இடர் எடையைப் பெறும் தகுதியைப் பெறுகின்றன. இது வங்கிகள் தங்களின் சில்லறை கடன் பிரிவை மேலும் விரிவுபடுத்தவும், வாடிக்கையாளர்களுக்கு எளிதாகக் கடன் வழங்கவும் வழிவகுக்கும். இந்த புதிய நடைமுறை 2027 ஏப்ரல் 1 முதல் அமலுக்கு வரும் என்று அறிவிக்கப்பட்டுள்ளது.
பெருநிறுவனங்களுக்கான கடன் வரம்பிலும் ரிசர்வ் வங்கி கணிசமான தளர்வுகளை அறிவித்துள்ளது. தரமதிப்பிடப்படாத பெரிய நிறுவனங்கள் மற்றும் வங்கி சாரா நிதி நிறுவனங்களுக்கான (NBFC) கடன் வரம்பு, முன்னதாக முன்மொழியப்பட்ட ரூ.200 கோடியிலிருந்து ரூ.500 கோடியாக அதிரடியாக உயர்த்தப்பட்டுள்ளது. இதன் மூலம் பெரிய அளவிலான நிதித் தேவைகளைக் கொண்ட நிறுவனங்கள் வங்கித் துறையிலிருந்து கூடுதல் மூலதனத்தைப் பெறுவது எளிதாகும். சந்தையில் பணப்புழக்கத்தை அதிகரிக்கவும், தொழில் முதலீடுகளை ஊக்குவிக்கவும் இந்த நடவடிக்கை எடுக்கப்பட்டுள்ளதாகக் கருதப்படுகிறது.
அந்நிய செலாவணி டெரிவேட்டிவ் சந்தையில் வெளிப்படைத்தன்மையை உறுதி செய்ய, அனைத்து ஓவர்-தி-கவுண்டர் (OTC) பரிவர்த்தனைகளையும் இந்தியக் கிளியரிங் கார்ப்பரேஷனிடம் (CCIL) புகாரளிக்க வங்கிகளுக்கு ரிசர்வ் வங்கி உத்தரவிட்டுள்ளது. பங்குச் சந்தை தவிர்த்து நேரடியாக இரு தரப்பினருக்கு இடையே நடக்கும் இந்த நிதி ஒப்பந்தங்கள் அனைத்தும் இனி முறையாகப் பதிவு செய்யப்பட வேண்டும். இருப்பினும், 1 மில்லியன் அமெரிக்க டாலர் வரையிலான சிறிய அளவிலான பரிவர்த்தனைகள் மற்றும் சில குறிப்பிட்ட கிளை நிறுவனங்களுக்கு இடையிலான பரிமாற்றங்களுக்கு இந்த அறிக்கையிடல் விதியிலிருந்து விலக்கு அளிக்கப்பட்டுள்ளது.
டிஜிட்டல் சேவைகளைப் பொறுத்தவரை, மக்கள் தங்கள் ஆதார் கார்டில் மொபைல் எண்களை எளிதாகப் புதுப்பித்துக் கொள்வதற்கான வசதிகளும் மேம்படுத்தப்பட்டுள்ளன. மேலும், வங்கிகள் தங்களின் தாய் நிறுவனம் மற்றும் கிளைகளுக்கு இடையே மேற்கொள்ளும் பரிவர்த்தனைகளை 2027 ஜூலை முதல் கட்டாயம் அறிக்கை செய்ய வேண்டும். இதற்கான படிப்படியான இலக்குகளை நிர்ணயித்துள்ள ரிசர்வ் வங்கி, 2028 ஜூலை மாதத்திற்குள் 100% அறிக்கையிடல் முறையைச் செயல்படுத்தத் திட்டமிட்டுள்ளது. இந்த மாற்றங்கள் ஒட்டுமொத்த நிதி அமைப்பில் நம்பகத்தன்மையையும், நிர்வாகத் திறனையும் மேம்படுத்தும் என எதிர்பார்க்கப்படுகிறது.