புதிய ரேஷன் கார்டு கோரி விண்ணப்பிக்கும் ஏழை எளிய மக்களுக்கு உதவும் வகையில், டெல்லி அரசு வருமான வரம்பு உள்ளிட்ட விதிகளில் சில முக்கிய மாற்றங்களைச் செய்துள்ளது. இதுவரை குடும்பத்தின் ஆண்டு வருமானம் 1 லட்சம் ரூபாய்க்குள் இருந்தால் மட்டுமே புதிய ரேஷன் கார்டுக்கு விண்ணப்பிக்க முடியும் என்ற நிலை இருந்தது. தற்போது இந்த வருமான வரம்பை 1.20 லட்சம் ரூபாயாக உயர்த்தி டெல்லி அமைச்சரவை ஒப்புதல் அளித்துள்ளது. இந்த அதிரடி மாற்றத்தால், வருமான வரம்பு காரணமாக தகுதி நீக்கம் செய்யப்பட்ட பல குடும்பங்கள் இனி உணவுப் பாதுகாப்பு திட்டத்தின் கீழ் பயன்பெற வழிவகை செய்யப்பட்டுள்ளது.
புதிய விதிகளின்படி, விண்ணப்பதாரர்கள் தங்களின் வருமானத்தை உறுதிப்படுத்த வருவாய்த் துறையிடமிருந்து பெறப்பட்ட அதிகாரப்பூர்வ வருமானச் சான்றிதழைச் சமர்ப்பிப்பது கட்டாயமாக்கப்பட்டுள்ளது. இதற்கு முன்பு நடைமுறையில் இருந்த ‘சுய அறிவிப்பு’ (Self-declaration) முறை தற்போது ரத்து செய்யப்பட்டுள்ளது. இதன் மூலம் தகுதியுள்ள உண்மையான பயனாளிகளை மட்டுமே கண்டறிந்து அரசு வழங்க முற்படுகிறது. மேலும், “முதலில் வருபவர்களுக்கே முன்னுரிமை” என்ற பழைய முறையை மாற்றி, நிலுவையில் உள்ள லட்சக்கணக்கான விண்ணப்பங்களையும் விரைவாகப் பரிசீலித்து அனைவருக்கும் சமமான வாய்ப்பு வழங்கப்படும் என்று அரசு உறுதி அளித்துள்ளது.
புதிய ரேஷன் கார்டுக்கு விண்ணப்பிக்க விரும்புவோர் ஆதார் கார்டு, குடும்ப உறுப்பினர்களின் புகைப்படம், வறுமைக் கோட்டிற்கு கீழ் உள்ளதற்கான சான்றிதழ் மற்றும் இருப்பிடச் சான்று போன்ற ஆவணங்களுடன் அருகில் உள்ள ரேஷன் அலுவலகத்திலோ அல்லது இணையதளம் வாயிலாகவோ விண்ணப்பிக்கலாம். விண்ணப்பித்த பிறகு, தேசிய உணவுப் பாதுகாப்பு இணையதளத்தில் தங்கள் பெயர் பட்டியலில் உள்ளதா என்பதைச் சரிபார்த்துக் கொள்ளலாம். இந்த வருமான வரம்பு உயர்வு மற்றும் விதிமுறை தளர்வுகள் மூலம், உணவுப் பாதுகாப்பு திட்டத்தின் கீழ் அதிகப்படியான மக்கள் பயன்பெறுவார்கள் என்றும், ஏழைகளின் பசிப்பிணி போக்க இது ஒரு முக்கிய மைல்கல்லாக அமையும் என்றும் எதிர்பார்க்கப்படுகிறது.