“நியாயமா? அநியாயமா?”… நடுத்தர மக்களால் இனி நகரத்தில் எப்படி வாழ முடியும்?… ரூ.29,000 வாடகை கொடுக்கும் பெண்ணின் பதிவு… வீடியோவைப் பார்த்து அதிர்ந்த நெட்டிசன்கள்…!!

உத்தரப் பிரதேச மாநிலம் நொய்டாவில் வசிக்கும் தனு பரத்வாஜ் என்ற பெண், தனது இன்ஸ்டாகிராம் பக்கத்தில் பகிர்ந்துள்ள ஒரு வீடியோ தற்போது இணையத்தில் வைரலாகி வருகிறது. அந்த வீடியோவில், தான் வசிக்கும் பாதி வசதிகள் மட்டுமே செய்யப்பட்ட அடுக்குமாடி குடியிருப்புக்கு மாதம் ₹29,000 வாடகை செலுத்துவதாகவும், இந்தத் தொகைக்கு இந்த வீட்டின் மதிப்பு தகுதியானதா என்றும் அவர் இணையவாசிகளைப் பார்த்துக் கேள்வி எழுப்பியுள்ளார். வாடகை வீடுகளின் விலை கிடுகிடுவென உயர்ந்து வரும் தற்போதைய சூழ்நிலையில், இவரது பதிவு சமூக வலைத்தளங்களில் பெரும் விவாதத்தை ஏற்படுத்தியுள்ளது.

மாதம் ₹29,000 வாடகைக்கு அந்த வீட்டில் என்னென்ன வசதிகள் உள்ளன என்பதை அவர் விரிவாக விளக்கியுள்ளார். அதன்படி, அந்த வீட்டில் மாடுலர் கிச்சன், புகைபோக்கி, குடிநீர் சுத்திகரிப்பான், வெந்நீர் வசதி மற்றும் மின்விசிறிகள் ஆகியவை பொருத்தப்பட்டுள்ளன. இதுமட்டுமின்றி, அவர் வசிக்கும் அந்த பிரமாண்ட குடியிருப்பில் நீச்சல் குளம், உடற்பயிற்சிக் கூடம், யோகா மண்டபம், பார்ட்டி ஹால், வாகன நிறுத்துமிடம் மற்றும் பூங்கா போன்ற பல்வேறு சொகுசு வசதிகளும் வாடகைதாரர்களுக்கு இலவசமாக வழங்கப்படுகின்றன.

இந்த வீடியோவை பார்த்த நெட்டிசன்கள் தங்களது இருவேறு கருத்துகளைப் பதிவிட்டு வருகின்றனர். சிலர், “நொய்டாவில் வாடகை கட்டணம் மிக வேகமாக அதிகரித்து வருகிறது; முழுமையான வசதிகள் இல்லாத ஒரு வீட்டுக்கு ₹29,000 வாடகை என்பது மிக அதிகம்” என விமர்சித்து வருகின்றனர். மறுபுறம், ஒரு சொகுசு வாழ்க்கைக்குத் தேவையான நீச்சல் குளம், ஜிம் உள்ளிட்ட அத்தனை வசதிகளும் அந்த வளாகத்திற்குள்ளேயே கிடைப்பதால், நொய்டாவைப் பொறுத்தவரை இது மிகவும் நியாயமான வாடகைதான் எனப் பலரும் ஆதரவு தெரிவித்து வருகின்றனர்.