ரஷ்யாவில் உள்நாட்டுத் தேவை அதிகரித்து வருவதாலும், பெட்ரோல் விலையேற்றத்தைக் கட்டுப்படுத்தவும் ஏப்ரல் 1 முதல் ஜூலை 31 வரை பெட்ரோல் ஏற்றுமதிக்குத் தடை விதிக்க அந்நாட்டு அரசு முடிவு செய்துள்ளது. உக்ரைன் போர் சூழல் மற்றும் சுத்திகரிப்பு நிலையங்கள் மீதான தாக்குதல்களால் ஏற்பட்ட எரிபொருள் பற்றாக்குறையைச் சமாளிக்க துணைப் பிரதமர் அலெக்சாண்டர் நோவாக் இந்த அதிரடி உத்தரவைப் பிறப்பித்துள்ளார். சர்வதேச சந்தையில் கச்சா எண்ணெய் விநியோகத்தில் கொந்தளிப்பு நிலவும் சூழலில், இந்தத் தடை முக்கியத்துவம் பெறுகிறது.
கடந்த ஆண்டில் மட்டும் ரஷ்யா நாளொன்றுக்குச் சுமார் 1,17,000 பீப்பாய்கள் பெட்ரோலை ஏற்றுமதி செய்துள்ள நிலையில், தற்போதைய தடையானது உலகளாவிய எரிசக்தி சந்தையில் தாக்கத்தை ஏற்படுத்தக்கூடும். குறிப்பாக, ரஷ்யாவின் பல பிராந்தியங்களில் நிலவும் எரிபொருள் தட்டுப்பாட்டை நீக்கவும், பருவகாலத் தேவையைப் பூர்த்தி செய்யவும் இந்த நடவடிக்கை எடுக்கப்பட்டுள்ளதாக அந்நாட்டு அரசு செய்தி நிறுவனமான ‘டாஸ்’ தெரிவித்துள்ளது. எனினும், கச்சா எண்ணெய் சுத்திகரிப்பு அளவு கடந்த ஆண்டைப் போலவே நிலையாக இருப்பதாக அரசு தரப்பில் கூறப்படுகிறது.
இந்தத் தடையால் இந்தியாவுக்கு நேரடி பாதிப்பு ஏற்படுமா என்ற கேள்வி எழுந்துள்ளது. இந்தியா ரஷ்யாவிடமிருந்து பெரும்பாலும் கச்சா எண்ணெய்யைத் தான் நேரடியாக இறக்குமதி செய்கிறது; பெட்ரோல் அல்லது டீசலை அல்ல. இந்தியாவில் வலுவான எண்ணெய் சுத்திகரிப்பு ஆலைகள் இருப்பதால், கச்சா எண்ணெய்யைப் பெட்ரோலாக மாற்றும் வசதி நமக்குப் போதுமானதாக உள்ளது. எனவே, தற்போதைய பெட்ரோல் ஏற்றுமதித் தடையால் இந்தியாவுக்கு உடனடி நெருக்கடி ஏதுமில்லை என்றாலும், சர்வதேச சந்தையில் ஏற்படும் விலை மாற்றங்கள் மறைமுகப் பாதிப்புகளை ஏற்படுத்த வாய்ப்புள்ளது.