பாகிஸ்தானின் மத்தியஸ்தத்துடன் ஈரானுடனான அமெரிக்க-இஸ்ரேல் போரில் போர்நிறுத்தம் அறிவிக்கப்பட்ட சில மணிநேரங்களிலேயே, நேற்று (புதன்கிழமை) மத்திய பெய்ரூட்டின் பரபரப்பான பகுதிகளில் இஸ்ரேல் திடீர் தாக்குதல்களை நடத்தியது. எவ்வித முன்னறிவிப்புமின்றி நடத்தப்பட்ட இந்தத் தாக்குதலில் குறைந்தது 254 பேர் கொல்லப்பட்டதாகவும், நூற்றுக்கணக்கானோர் காயமடைந்ததாகவும் லெபனான் அரசு தெரிவித்துள்ளது. இந்தச் சம்பவம் போர்நிறுத்த ஒப்பந்தத்தின் மீதான நம்பிக்கையைச் சிதைக்கும் வகையில் அமைந்துள்ளது.
இந்தத் தாக்குதலை போர்நிறுத்த ஒப்பந்தத்தின் அப்பட்டமான மீறல் என்று ஈரான் வெளியுறவு அமைச்சர் அப்பாஸ் அராக்சி கடுமையாகச் சாடியுள்ளார். இஸ்ரேலின் இத்தகைய நடவடிக்கைகள் தொடர்ந்தால், போர்நிறுத்த ஒப்பந்தத்திலிருந்து ஈரான் முழுமையாக விலக நேரிடும் என்று அவர் எச்சரித்துள்ளார். மேலும், இந்தத் தாக்குதலுக்கு தகுந்த பதிலடி கொடுக்கப்படும் என்று ஈரானின் புரட்சிகர காவல்படை சூளுரைத்துள்ளது, இதனால் அப்பகுதியில் மீண்டும் போர் மேகங்கள் சூழத் தொடங்கியுள்ளன.
பதற்றத்தின் உச்சகட்டமாக, உலகளாவிய எண்ணெய் விநியோகத்தில் முக்கியப் பங்கு வகிக்கும் ஹார்முஸ் ஜலசந்தி வழியாக எண்ணெய் கப்பல்கள் செல்வதை ஈரான் தடுத்து நிறுத்தியுள்ளது. ஈரானின் அனுமதியின்றி ஜலசந்திக்குள் நுழையும் எந்தவொரு கப்பலையும் அழித்துவிடுவோம் என்று புரட்சிகர காவல்படை பகிரங்கமாக எச்சரித்துள்ளது. இந்தத் திடீர் தடையால் சர்வதேச சந்தையில் கச்சா எண்ணெய் விநியோகத்தில் பெரும் பாதிப்பு ஏற்படும் சூழல் உருவாகியுள்ளது.
மேலும், ஹார்முஸ் ஜலசந்தி வழியாகச் செல்லும் கப்பல்களிடமிருந்து கட்டணம் வசூலிக்கவும் ஈரான் முடிவு செய்துள்ளதாகத் தகவல்கள் வெளியாகியுள்ளன. இந்த ஜலசந்திப் பாதையைத் தனது முழுக் கட்டுப்பாட்டிற்குள் கொண்டுவருவதன் மூலம், சர்வதேச சமூகத்திற்கு அழுத்தம் கொடுக்க ஈரான் திட்டமிட்டுள்ளதாகத் தெரிகிறது. இஸ்ரேலின் தாக்குதலும் அதற்குப் பதிலடியாக ஈரான் எடுத்துள்ள இந்தத் தீவிர நடவடிக்கைகளும் உலக நாடுகளிடையே பெரும் கவலையை ஏற்படுத்தியுள்ளன.