“சின்னமாவுடன் கூட்டணி”… அதிமுகவில் இருந்து விலகிய முக்கிய புள்ளி.. இபிஎஸ்-க்கு செம ஷாக் கொடுத்த சசிகலா…..!

அதிமுக முன்னாள் நாடாளுமன்ற உறுப்பினர் வசந்தி முருகேசன், அக்கட்சியிலிருந்து விலகி சசிகலா முன்னிலையில் அவரது அணியில் இணைந்திருப்பது தமிழக அரசியலில் கவனத்தைப் பெற்றுள்ளது. கடந்த 2014-ம் ஆண்டு அதிமுக சார்பில் தென்காசி தொகுதியில் போட்டியிட்டு வெற்றி பெற்ற இவர், ஜெயலலிதாவின் மறைவுக்குப் பிறகு ஏற்பட்ட அரசியல் மாற்றங்களால் 2019-ல் திமுகவில் இணைந்தார். எனினும், அங்கு நீண்ட காலம் நீடிக்காமல் 2023-ல் எடப்பாடி பழனிசாமி முன்னிலையில் மீண்டும் அதிமுகவுக்கே திரும்பினார். தற்போது அதிமுகவின் உட்கட்சிப் பூசல்கள் மற்றும் அரசியல் நகர்வுகளுக்கு மத்தியில், மீண்டும் ஒருமுறை அவர் தனது அரசியல் பாதையை மாற்றிக்கொண்டுள்ளார்.

அதிமுகவிலிருந்து இன்னும் பலர் தன்னுடன் வருவார்கள் என்று சசிகலா தொடர்ந்து கூறி வரும் நிலையில், வசந்தி முருகேசனின் இந்த முடிவு அதன் தொடக்கமாகப் பார்க்கப்படுகிறது. சசிகலாவை நேரில் சந்தித்து தன்னை இணைத்துக் கொண்ட வசந்தி முருகேசன், எடப்பாடி பழனிசாமி தலைமையிலான அதிமுகவின் செயல்பாடுகள் மீது அதிருப்தி தெரிவித்தே இந்த முடிவை எடுத்துள்ளதாகக் கூறப்படுகிறது. அதிமுகவின் முக்கிய நிர்வாகிகள் மற்றும் முன்னாள் மக்கள் பிரதிநிதிகளைத் தன் பக்கம் இழுப்பதன் மூலம் கட்சியில் தனது பிடியை வலுப்படுத்த சசிகலா முயற்சி செய்து வரும் சூழலில், வசந்தி முருகேசனின் வருகை சசிகலா தரப்பினருக்குப் புதிய உற்சாகத்தைத் தந்துள்ளதாகத் தெரிகிறது.