அமெரிக்க அதிபர் ட்ரம்ப் முன்மொழிந்த 15 அம்ச காசா அமைதித் திட்டத்தை இஸ்ரேல் பிரதமர் பெஞ்சமின் நெதன்யாகு திட்டவட்டமாக நிராகரித்துள்ளார். ஹமாஸ் அமைப்பைச் சற்றே பலவீனப்படுத்துவது தங்களுக்கு எவ்வித நிரந்தரத் தீர்வையும் தராது என்றும், அந்த அமைப்பை வேரோடு முற்றிலுமாக அழிப்பதே இஸ்ரேலின் முதன்மை இலக்கு என்றும் அவர் திட்டவட்டமாகத் தெரிவித்துள்ளார். அமெரிக்காவுடன் இது குறித்து தொடர்ந்து பேச்சுவார்த்தை நடத்தி வந்தாலும், ட்ரம்ப் நிர்வாகத்தின் அனைத்துத் திட்டங்களையும் தங்களால் ஏற்றுக்கொள்ள முடியாது என அவர் தெளிவுபடுத்தியுள்ளார்.
காசாவில் இருந்து இஸ்ரேலிய ராணுவப் படைகள் பின்வாங்க வேண்டும் என்றால், ஹமாஸ் அமைப்பினர் தங்களிடம் உள்ள அனைத்து ஆயுதங்களையும் முழுமையாகத் தர ஒப்படைக்க வேண்டும் என்பதே நெதன்யாகுவின் பிரதான நிபந்தனையாகும். ஹமாஸிடம் உள்ள ஆயுதங்கள் முழுமையாகப் பறிமுதல் செய்யப்படும் வரை காசாவை விட்டு இஸ்ரேலிய ராணுவம் வெளியேறாது என இஸ்ரேல் அரசு உறுதியாக உள்ளது. அமைதி வாரியப் பிரதிநிதிகளுடனான சமீபத்திய சந்திப்பிலும் இஸ்ரேல் இதே நிலைப்பாட்டைத்தான் உறுதி செய்துள்ளது.
முன்னதாக, காசாவில் போரை முடிவுக்குக் கொண்டுவரும் தனது அமைதித் திட்டம் மாபெரும் வெற்றி அடைந்துவிட்டதாகவும், ஹமாஸ் ஆயுதங்களைக் கைவிடச் சம்மதித்துவிட்டதாகவும் அதிபர் ட்ரம்ப் பெருமிதம் தெரிவித்திருந்தார். ஆனால், இஸ்ரேலின் தேசிய பாதுகாப்பு அமைச்சரான இட்டாமர் பென் கிவிர் போன்ற தீவிர வலதுசாரிக் கூட்டணிக் கட்சியினர் இந்த அமைதித் திட்டத்தை ஏற்க முடியாது என நெதன்யாகுவுக்குக் கடுமையான அழுத்தம் கொடுத்து வருகின்றனர். இதனால், அமெரிக்காவின் முழு ஆதரவுடன் உருவாக்கப்பட்ட இந்த அமைதிச் செயல்பாடு தற்போது பெரும் பின்னடைவைச் சந்தித்துள்ளது.