நேபாளத்தின் மலைப்பகுதியில் கடந்த ஆகஸ்ட் 26 அன்று ஏற்பட்ட திடீர் வெள்ளப்பெருக்கு மற்றும் நிலச்சரிவு உலகையே பெரும் அதிர்ச்சியில் ஆழ்த்தியுள்ளது. இந்த இயற்கை பேரிடரில் 670-க்கும் மேற்பட்டோர் உயிரிழந்துள்ள நிலையில், நூற்றுக்கணக்கானோர் காணாமல் போயுள்ளனர். ஆயிரக்கணக்கான மக்களைப் பாதிப்புக்குள்ளாக்கிய இந்த பேரழிவுக்கு இடையே, நொடி நேரச் சிந்தனையாலும் மனஉறுதியாலும் மரணத்தின் பிடியிலிருந்து இந்திய வம்சாவளித் தம்பதி உயிர் தப்பிய சம்பவம் நெகிழ்ச்சியையும் ஆச்சரியத்தையும் ஏற்படுத்தியுள்ளது.
அமெரிக்காவின் சான் ஃப்ரான்சிஸ்கோ நகரில் வசித்து வரும் அஞ்சனா ராஜா மற்றும் அவரது கணவர் பட்டாபிராமன் வெங்கடேசன் ஆகியோர் திபெத்திற்குத் தங்களது முதல் புனிதப் பயணமாகச் சென்றிருந்தனர். நேபாளத்தின் ரசுவா மாவட்டத்தில் உள்ள திமுரே என்ற கிராமத்தின் வழியே சுற்றுலாப் பேருந்தில் மகிழ்ச்சியாகச் சென்றுகொண்டிருந்த வேளையில், திடீரென மலைகளிலிருந்து பழுப்பு நிறத்தில் 60 முதல் 70 அடி உயரத்திற்கு ராட்சத வெள்ளமும் இடிபாடுகளும் சீறிக்கொண்டு வருவதைக் கண்டு அதிர்ந்துபோயினர்.
திடீரெனப் பாய்ந்து வந்த பேரலை காட்டுத் தீயா, நிலநடுக்கமா அல்லது பனிச்சரிவா என்று கூடத் தெரியாமல் பேருந்தில் இருந்த அனைவரும் திணறியுள்ளனர். நிலைமையின் தீவிரத்தை உணர்ந்த ஓட்டுநரும் நடத்துநரும் வாகனத்திலிருந்து உடனடியாகக் குதித்துத் தப்பித்துவிட்டனர். ஆபத்து மிக அருகில் வந்ததைக் கண்ட அஞ்சனா, தப்பிக்க வேறு வழியே இல்லை என்ற எண்ணத்தில் கணவரின் சட்டையைப் பிடித்துக்கொண்டு உரக்கக் கத்தி, உடனடியாகப் பேருந்தை விட்டு வெளியேறி உயரிய நிலப்பகுதியை நோக்கி ஓடத் தொடங்கியுள்ளார்.
அமைதி இழந்த சூழலில், வழிகாட்டி ஒருவரின் உதவியுடன் கண்மூடித் திறப்பதற்குள் சுமார் 500 படிகட்டுகளைக் கடந்து மலையின் உச்சிக்கு அவர்கள் விரைந்தனர். அவர்கள் ஏறிய சில நொடிகளிலேயே, வழியில் தஞ்சமடைய நினைத்த ஒரு காவல் முகாம் மற்றும் அருகிலிருந்த வீடுகள் அனைத்தும் அவர்களின் கண்முன்பே பிரம்மாண்டமான வெள்ளத்தில் அடித்துச் செல்லப்பட்டன. இத்தனை ஆபத்தான ஏற்றத்திலும் கணவரை உறுதியாகப் பற்றிக்கொண்டு அஞ்சனா மலையுச்சியை எட்டியுள்ளார்.
மலையின் உச்சியை அடைந்த அஞ்சனா – பட்டாபிராமன் தம்பதி, அங்கிருந்த உள்ளூர் மக்களுடனும் சக சுற்றுலாப் பயணிகளுடனும் இணைந்து ஒரு ஆட்டுக் கொட்டகையில் அச்சத்துடன் இரவைக் கழித்தனர். மறுநாள் காலையில் மீட்புக் குழுவினரால் ஹெலிகாப்டர் மூலம் அவர்கள் பாதுகாப்பாக மீட்கப்பட்டனர். அஞ்சனா தம்பதியின் அந்த நொடி நேரச் சாதுர்யத்தால், அவர்களது பேருந்தில் பயணித்த அனைத்துப் பயணிகளும் அதிர்ஷ்டவசமாக உயிர் தப்பினர்.