திக்.. திக்..! நொடிகள் தவறினால் உயிர் போயிடும்… மரணத்தின் விளிம்பில் 350 உயிர்கள்…! சேற்றில் நீந்தி வந்து மீட்ட ராணுவம்… நெஞ்சை உலுக்கும் வீடியோ…!!

நேபாளத்தில் ஏற்பட்ட பயங்கரமான திடீர் வெள்ளப்பெருக்கு மற்றும் நிலச்சரிவு காரணமாக, அங்குள்ள அப்பர் திரிசூலி நீர்மின் திட்டப் பணிகளுக்கான சுரங்கப்பாதைக்குள் பெருமளவில் சகதி மற்றும் வெள்ள நீர் புகுந்தது. இதனால், அந்தப் பகுதியில் வேலை பார்த்துக்கொண்டிருந்த நூற்றுக்கணக்கான தொழிலாளர்களும், உள்ளூர் மக்களும் எதிர்பாராத விதமாக சுரங்கப்பாதைக்குள் சிக்கிக் கொண்டனர். வெள்ளத்தின் வேகம் மற்றும் அடர்த்தியான சேறு காரணமாக அவர்கள் வெளியே வர முடியாமல் தவித்தனர்.

இந்தச் சம்பவத்தைத் தொடர்ந்து, நேபாள ராணுவம் உடனடியாக ஹெலிகாப்டர்கள் மற்றும் கயிறுகள் மூலம் துரித மீட்புப் பணிகளில் களமிறங்கியது. அடர்த்தியான சேற்றில் ஊர்ந்து வந்து உயிர் தப்பியவர்களை ராணுவத்தினர் பத்திரமாக மீட்கும் நெஞ்சை பதறவைக்கும் வீடியோ காட்சிகள் தற்போது வெளியாகியுள்ளன. மிகக் கடினமான சூழலிலும் துணிச்சலாக செயல்பட்ட மீட்புக் குழுவினர், இதுவரை இந்தியர்கள் உட்பட சுமார் 350 பேரை உயிருடன் மீட்டுப் பாதுகாப்பான இடங்களுக்குக் கொண்டு சேர்த்துள்ளனர்.

மீட்புப் பணிகள் தொடர்ந்து தீவிரமாக நடைபெற்று வந்தாலும், சுரங்கப்பாதைக்குள் இன்னும் சுமார் 100-க்கும் மேற்பட்டோர் சிக்கியிருக்கலாம் என அஞ்சப்படுகிறது. அப்பகுதி முழுவதும் பல அடி உயரத்திற்குச் சகதி தேங்கியுள்ளதால், சுரங்கத்தின் நுழைவு மற்றும் வெளியேறும் வழிகளைக் கண்டுபிடிப்பதில் மீட்புக் குழுவினருக்கு பெரும் சவால் ஏற்பட்டுள்ளது. மோசமான வானிலை மற்றும் மீண்டும் வெள்ளம் வரக்கூடும் என்ற எச்சரிக்கைகளுக்கு மத்தியிலும், மீதமுள்ளவர்களைக் காப்பாற்றும் போராட்டம் தொடர்ந்து நடைபெற்று வருகிறது.