நேபாளத்தில் கடந்த வாரம் ஏற்பட்ட கோரமான பெருவெள்ளம் பெரும் உயிர்ச்சேதத்தையும், உள்கட்டமைப்பு அழிவுகளையும் ஏற்படுத்தியுள்ளது. பலர் உயிரிழந்துள்ள நிலையில், மாயமான பல நூறு பேரைத் தேடும் பணிகள் தீவிரமாக நடைபெற்று வருகின்றன. இந்தத் திடீர் பேரழிவிற்கான புவியியல் காரணங்களை மிகத் தெளிவாக விளக்கும் காணொளி ஒன்று தற்போது சமூக வலைத்தளங்களில் வைரலாகி வருகிறது. இமயமலையின் குறுகிய பள்ளத்தாக்குகள் வழியாக மணிக்கு சுமார் 105 மைல் (170 கி.மீ) வேகத்தில், 300 அடி உயரத்திற்குத் தண்ணீர் மற்றும் பாறைக் குப்பைகள் ஒரு சுனாமி அலைபோலப் பாய்ந்து வந்ததே இந்தப் பெரும் சேதத்திற்குக் காரணம் என அந்த காணொளி மூலம் தெரியவந்துள்ளது.
இந்தப் பேரழிவின் தொடக்கப் புள்ளியாக, சுமார் 16,700 அடி உயரத்தில் அமைந்துள்ள ‘யாலா பனிப்பாறையில்’ ஏற்பட்ட மாபெரும் சரிவு அமைந்துள்ளது. பொதுவாகப் பனிப்பாறைகளின் மீது படர்ந்திருக்கும் வெள்ளை நிறப் பனிப்படலம் சூரிய வெப்பத்தைப் பிரதிபலித்து, அது உருகுவதைக் கட்டுப்படுத்தும். ஆனால், இந்த ஆண்டு நேபாளத்தில் நிலவிய கடுமையான கோடை வெப்பத்தால் அந்தப் புதிய பனிப்படலம் உருகி, அடியில் இருந்த பாறைகள் வெளிப்பட்டன. இந்தப் பாறைகள் சூரிய வெப்பத்தை அதிகளவில் உறிஞ்சியதால் பனிக்கட்டி உருகும் வேகம் பலமடங்கு அதிகரித்தது. இதனுடன் பனிப்பாறையின் பலவீனமான அமைப்பும், செங்குத்தான சரிவும் சேர்ந்து சுமார் ஒரு மைல் அகலத்திற்குப் பனிப்பாறை சரிந்து விழக் காரணமானது.
இந்தச் சரிவின் வேகமும் சீற்றமும் கற்பனைக்கு எட்டாத வகையில் இருந்துள்ளது. காலை 10.52 மணிக்கு யாலா பனிப்பாறை சரிந்த நிலையில், அதிலிருந்து வெளியான பல லட்சம் டன் பனிக்கட்டிகளும் பாறைகளும் நீருடன் கலந்து மின்னல் வேகத்தில் கீழ்நோக்கிப் பாய்ந்துள்ளன. வெறும் 7 நிமிடம் 40 வினாடிகளில் சுமார் 21 கிலோமீட்டர் தூரத்தைக் கடந்து, காலை 10.59 மணிக்கெல்லாம் சீனா – நேபாள எல்லைச் சோதனைச் சாவடியை இந்த வெள்ளம் தரைமட்டமாக்கியுள்ளது. குறுகிய பள்ளத்தாக்குகளில் தண்ணீர் மேல்நோக்கி எழும்பியதோடு, ஆற்றின் வளைவுகளில் சுமார் 2.4 கிலோமீட்டர் தூரம் வரை தண்ணீர் கரையை மீறி மேல்நோக்கித் தள்ளப்பட்டதில் இருந்தே இதன் அசுர பலத்தை உணர முடிகிறது.
எல்லைச் சாவடியைத் தாண்டிய பிறகும் இந்த வெள்ளத்தின் கோரத்தாண்டவம் ஓயவில்லை. சரிவு ஏற்பட்ட இடத்திலிருந்து சுமார் 74 கிலோமீட்டர் தொலைவில் உள்ள திரிஷூலி பஜார் பகுதியை நோக்கிப் பாய்ந்த வெள்ளம், வழியிலிருந்த பாலங்கள் மற்றும் கட்டிடங்கள் அனைத்தையும் அடித்துச் சென்றது. மலைப்பகுதி முடிந்து சமவெளிப் பகுதியை அடைந்ததால் மட்டுமே இதன் வேகம் சற்று குறைந்தது. தொடக்கம் முதல் இறுதிவரை கேமராக்களில் பதிவாகியுள்ள இந்தத் திடீர் இயற்கைப் பேரழிவு, புவி வெப்பமடைதலால் பல ஆண்டுகளாக வலுவிழந்து வரும் இமயமலைப் பனிப்பாறைகளுக்கு ஏற்பட்டுள்ள அபாயத்தை உலகிற்கு எச்சரிக்கும் ஒரு சாட்சியாக அமைந்துள்ளது.