ஒரு இடத்துக்காக இப்படியா?… நின்ற இடத்திலேயே சரிந்த 2 முதியவர்கள்… அலறி ஓடிய மக்கள்… பட்டப்பகலில் நடந்த கொடூரம்…!!

நெல்லை டவுன் மணிப்புரம் பகுதியில் கார் நிறுத்துவது தொடர்பான தகராறில் இரண்டு முதியவர்கள் பட்டப்பகலில் கத்தியால் குத்திக்கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. குவைத்தில் வேலை பார்த்துவிட்டு சொந்த ஊரில் வசித்து வந்த சகோதரர்களான டால்டன் மற்றும் நிக்கோலஸ் ராஜரத்தினம் ஆகியோரே இந்த கொடூர சம்பவத்தில் உயிரிழந்தவர்கள் ஆவர். டால்டனின் வீட்டின் அருகே உள்ள குடும்ப கோவில் பகுதியில் கார் நிறுத்துவது தொடர்பாக, சென்னையில் வெல்டிங் தொழிலாளியாக வேலை பார்த்து வரும் அதே பகுதியைச் சேர்ந்த செந்தில்குமார் என்பவருக்கும் இந்த குடும்பத்தினருக்கும் இடையே அடிக்கடி மோதல் போக்கு இருந்து வந்துள்ளது.

சம்பவத்தன்று காலை, விடுமுறையில் சொந்த ஊருக்கு வந்திருந்த செந்தில்குமாருக்கும் டால்டனின் மகன் நரேனுக்கும் இடையே கார் பார்க்கிங் விவகாரத்தில் மீண்டும் வாக்குவாதம் முற்றி கைகலப்பு உருவானது. இந்த சண்டையை விலக்கி விட்டு சமாதானம் செய்ய முயன்ற பெரியப்பா நிக்கோலஸ் ராஜரத்தினத்தை செந்தில்குமார் தான் மறைத்து வைத்திருந்த கத்தியால் திடீரென சரமாரியாக குத்தியுள்ளார். அவரது அலறல் சத்தம் கேட்டு ஓடிவந்த டால்டனையும், தடுக்க முயன்ற நரேனையும் ஆத்திரம் தீராத செந்தில்குமார் கொடூரமாக தாக்கினார். இந்த கண்மூடித்தனமான தாக்குதலில் கொலையாளியான செந்தில்குமாருக்கும் கைகளில் பலத்த காயம் ஏற்பட்டது.

படுகாயமடைந்து ரத்த வெள்ளத்தில் கிடந்தவர்களை மீட்ட அக்கம் பக்கத்தினர் உடனடியாக சிகிச்சைக்காக மருத்துவமனைக்கு அனுப்பி வைத்தனர். இதில் டால்டன் நெல்லை அரசு மருத்துவமனைக்கு செல்லும் வழியிலேயே பரிதாபமாக உயிரிழந்தார்; தனியார் மருத்துவமனையில் அனுமதிக்கப்பட்ட நிக்கோலஸ் ராஜரத்தினம் தீவிர சிகிச்சை அளிக்கப்பட்டும் பலனின்றி மரணமடைந்தார். காயமடைந்த நரேன் மற்றும் கொலையாளி செந்தில்குமார் இருவருக்கும் தற்போது அரசு மருத்துவமனையில் போலீஸ் காவலில் சிகிச்சை அளிக்கப்பட்டு வருகிறது. நெல்லை மாநகர போலீஸ் கமிஷனர் சேகர் சஞ்சய் தேஷ்முக் உள்ளிட்ட காவல் துறை உயர் அதிகாரிகள் சம்பவ இடத்திற்கு நேரில் சென்று, சிசிடிவி பதிவுகளைக் கைப்பற்றி இந்த இரட்டைக்கொலை குறித்து தீவிர விசாரணை மேற்கொண்டு வருகின்றனர்.