நீட் வினாத்தாள் கசிவு… சராசரி மாணவர்களின் அசாத்திய மார்க்.. அம்பலமான நீட் பேப்பர் லீக் ரகசியம்..! நெட்டிசன்களை அதிரவைத்த ராஜஸ்தான் ஊழல்…!!

நீட் தேர்வு வினாத்தாள் கசிவு வழக்கில், ராஜஸ்தானைச் சேர்ந்த பிவால் குடும்பத்தைச் சேர்ந்த தினேஷ் மற்றும் மாங்கிலால் பிவால் ஆகியோர் முக்கிய குற்றவாளிகளாக உருவெடுத்துள்ளனர். இக்குடும்பத்தைச் சேர்ந்த ஐந்து பிள்ளைகள் கடந்த ஆண்டு (2025) ஒரே நேரத்தில் நீட் தேர்வில் தேர்ச்சி பெற்று பல்வேறு அரசு மருத்துவக் கல்லூரிகளில் சேர்ந்துள்ளனர். இந்த ஆண்டு தேர்வு எழுதிய மேலும் இரு பிள்ளைகளுக்காக இவர்கள் வினாத்தாளை விலைக்கு வாங்கியதாகக் குற்றம் சாட்டப்பட்டுள்ளது. வினாத்தாள் கசிவு தொடர்பாக சிபிஐ (CBI) தீவிர விசாரணை நடத்தி வரும் நிலையில், தினேஷ், மாங்கிலால் மற்றும் தினேஷின் மகனான விகாஸ் பிவால் ஆகியோர் கைது செய்யப்பட்டுள்ளனர்.

பள்ளிகளிலும் கல்லூரிகளிலும் சராசரி அல்லது அதற்கும் குறைவான மதிப்பெண்களைப் பெற்ற இக்குடும்பத்துப் பிள்ளைகள், நீட் தேர்வில் மட்டும் எப்படி அசாதாரணமான முறையில் மிக அதிக மதிப்பெண்களைப் பெற்றனர் என்பதுதான் தற்போதைய விசாரணையின் மையப்புள்ளியாக உள்ளது. உதாரணமாக, கைது செய்யப்பட்டுள்ள விகாஸ் பிவால் 12-ஆம் வகுப்பில் 55% மதிப்பெண்கள் மட்டுமே எடுத்தவர், ஆனால் நீட் தேர்வில் 86% பெற்று அரசு மருத்துவக் கல்லூரியில் சேர்ந்துள்ளார். மருத்துவக் கல்லூரியிலும் அவரது வருகைப்பதிவு மிகக் குறைவாக இருந்ததோடு, கல்லூரித் தேர்வுகளிலும் வெறும் 30% மதிப்பெண்களையே எடுத்துள்ளார். இதேபோல் இக்குடும்பத்தின் மற்றுமொரு மாணவியான குஞ்சன், பயிற்சி மையத் தேர்வுகளில் மிகக் குறைந்த மதிப்பெண்களே எடுத்த போதிலும், நீட் தேர்வில் 92.53 சதவீத மதிப்பெண்களைக் குவித்து வாரணாசி அரசு மருத்துவக் கல்லூரியில் இடம் பிடித்துள்ளார்.

ஒரே குடும்பத்தைச் சேர்ந்த பல பிள்ளைகள், தங்களின் சராசரி கல்வித் திறனையும் தாண்டி நீட் தேர்வில் இத்தகைய அசாத்திய வெற்றியைப் பெற்றது சிபிஐ மற்றும் விசாரணை அமைப்புகளுக்குப் பெரும் சந்தேகத்தை ஏற்படுத்தியுள்ளது. கடந்த ஆண்டும் இந்த பிள்ளைகளின் தேர்ச்சிக்கு வினாத்தாள் கசிவு போன்ற ஏதேனும் சட்டவிரோத ‘உதவிகள்’ கிடைத்துள்ளதா என்ற கோணத்தில் அதிகாரிகள் விசாரித்து வருகின்றனர். கடந்த 2025 நவம்பரில் தங்களது குடும்பத்தைச் சேர்ந்த 5 பேர் எம்பிபிஎஸ் (MBBS) படிப்பிற்குத் தேர்வானதாக தினேஷ் பிவால் முகநூலில் பகிர்ந்த பதிவு மற்றும் இவர்களைப் பாராட்டி சீகார் பகுதி பயிற்சி மையங்கள் வெளியிட்ட விளம்பரங்கள் ஆகியவற்றை ஆதாரமாகக் கொண்டு சிபிஐ தற்போது விசாரணையை முடுக்கிவிட்டுள்ளது. இதற்கிடையில், கல்லூரிகளில் படித்து வந்த இக்குடும்பத்தைச் சேர்ந்த மற்ற மாணவிகள் தற்போது தலைமறைவாகியுள்ளனர்.