விருதுநகர் மாவட்டம் அரும்புக்கோட்டையில் சட்டமன்ற தொகுதி பாஜக நிர்வாகிகள் ஆலோசனை கூட்டம் நேற்று நடைபெற்றது. இதில் பாஜக மாநில தலைவர் நயினார் நாகேந்திரன் தலைமை தாங்கி உரையாற்றிய போது , “நெல்லையில் வருகின்ற 17ஆம் தேதி பாஜக சார்பில் நடைபெற உள்ள பூத் கமிட்டி மாநாட்டிற்கு, அரும்புக்கோட்டை சட்டமன்ற தொகுதியிலிருந்து குறைந்தபட்சம் 5 ஆயிரம் தொண்டர்களை திரட்டி வரவேண்டும். மண்டல பொறுப்பில் இருக்கும் ஒவ்வொருவருக்கும் அந்தந்த பாகம் எண் மற்றும் வாக்காளர் விவரங்கள் தெரிந்திருக்க வேண்டும். அதிமுக-பாஜக கூட்டணிக்கு ஒரே எதிரி திமுக மட்டும் தான். வரும் காலங்களில் பாஜக தொண்டர்கள் எந்த இடத்திற்கு சென்றாலும் உரிய மரியாதை கிடைக்க உறுதுணையாக இருப்பேன். எங்களது மனதில் இடம்பெறும் வகையில் உங்களது பணி இருக்க வேண்டும்”என்று உரையாற்றினார் .
இதன்பின் செய்தியாளர்களுக்கு அளித்த பேட்டியில், “கூட்டணி கட்சிகளுக்கு ஒதுக்கப்படும் தொகுதிகள் குறித்து கூட்டணி கட்சியினர் ஒன்று கூடி கலந்துரையாடி முடிவெடுப்போம். ஓ. பன்னீர்செல்வம் கூட்டணியில் இருந்து விலகிச் சென்று விட்டதை பற்றி கருத்து ஏதும் சொல்ல விரும்பவில்லை” என்று கூறினார்.