களவாணி படத்தையே மிஞ்சிய த்ரில்லான கல்யாணம்… காதலியின் அப்பா முன்பே வாலிபர் செய்த செயல்.. நாமக்கல்லையே அதிரவிட்ட சம்பவம்…!

நாமக்கல் மாவட்டம் ராசிபுரம் அருகே கோனேரிப்பட்டியை சேர்ந்த ஆறுமுகம் என்பவருடைய மகன் அஜய் (26) எஞ்சினியராக பணியாற்றி வருகின்றார். இவருடைய உறவினரான நாமக்கல் ஏ எஸ் பேட்டையை சேர்ந்த தண்டபாணியின் மகளும், இன்ஜினியரிங் கல்லூரி மாணவிகளுமான நந்தினியும் (21) கடந்த சில வருடங்களாக காதலித்து வந்துள்ளனர். இவர்களின் காதல் நந்தினியின் குடும்பத்தினருக்கு தெரிய வந்ததால் எதிர்ப்பு தெரிவித்த நிலையில் இருவரும் திருமணம் செய்து கொள்ள திட்டமிட்டனர். இதனிடையே நேற்று வழக்கம்போல திருச்செங்கோட்டில் உள்ள தனியார் கல்லூரிக்கு நந்தினி சென்ற நிலையில் மாலையில் அவர் பஸ்ஸில் நாமக்கல்லுக்கு வந்து இறங்கியுள்ளார் .

பிறகு ஏற்கனவே திட்டமிட்டபடி நாமக்கல்லில் உள்ள சேலை சாலை சந்திப்பில் அஜய் மற்றும் அவருடைய உறவினர்கள் யுவராஜ், ஜெயலக்ஷ்மி ஆகியோர் உட்பட நான்கு பேர் காத்திருந்து காரில் நந்தினியை ஏற்றி சென்றனர். இதனிடையே மாணவியை அழைத்துச் செல்ல அங்கு வந்து அவருடைய தந்தை தண்டபாணி மகள் காதலனுடன் காரில் ஏறுவதை கண்டு அதிர்ச்சி அடைந்து கூச்சலிட்டு உள்ளார். தொடர்ந்து அவர் அஜய் மற்றும் உறவினர்களுடன் வாக்குவாதத்தில் ஈடுபட்டார். பிறகு உறவினர்கள் சிலரை செல்போனில் தொடர்பு கொண்டு சம்பவ இடத்திற்கு வரவழைத்து தகராறு செய்து உள்ளார். அப்போது திடீரென்று காருக்குள் சென்ற அஜய் தான் கையில் வைத்திருந்த தாலியை நந்தினியின் கழுத்தில் கட்டியுள்ளார். அது மட்டுமல்லாமல் இருவரும் மோதிரம் மாற்றிக்கொண்டனர்.

காருக்குள் தன்னுடைய கண்முன்னே மகளுக்கு காதலன் தாலி கட்டியதை கண்டு ஆத்திரம் அடைந்த தண்டபாணி மற்றும் உறவினர்கள் காரின் கண்ணாடியை உடைத்தனர். மேலும் காரில் இருந்து அஜய் உள்ளிட்டோரை தாக்கிய நிலையில் அங்கு பரபரப்பு ஏற்பட்டது. சம்பவத்தை கண்ட போக்குவரத்து போலீசார் பொதுமக்கள் உதவியோடு அனைவரையும் காவல் நிலையத்திற்கு அழைத்துச் சென்றனர். அங்கு போலீசார் விசாரணை நடத்திய நிலையில் அஜயை விருப்பத்துடன் திருமணம் செய்து கொண்டதாக நந்தினி தெரிவித்த நிலையில் இருதரப்பையும் சமாதானம் செய்து போலீசார் அனுப்பி வைத்தனர். விமலின் களவாணி பட பாணியில் நடந்த இந்த சம்பவம் நாமக்கல்லை அதிரவிட்டது.