தலைமை தேர்தல் ஆணையர் ஞானேஷ் குமாரின் பதவி விலகலை வலியுறுத்தி டெல்லி ஜந்தர் மந்தரில் சிஜேபி அமைப்பு சா சார்பில் நடத்தவிருந்த போராட்டம் தேசிய அளவில் பெரும் பரபரப்பை ஏற்படுத்தியுள்ளது. இப்போராட்டத்தை தடுத்து நிறுத்த மத்திய அரசு மேற்கொண்ட தீவிர நடவடிக்கைகளால் டெல்லியே முடங்கியது. சிஜேபி அமைப்பின் நிறுவனர் அபிஜித் தீப்கே விமானத்திலே தடுத்து நிறுத்தப்பட்டதும், பிரபல யூடியூபர் துருவ் ராதே வீட்டுக் காவலில் வைக்கப்பட்டதும் ஜனநாயகத்தின் குரல்வளை நெறிக்கப்படுவதற்கான சான்றுகளாக எதிர்க்கட்சிகளால் சுட்டிக்காட்டப்பட்டுள்ளன. டெல்லியில் சுமார் 45 மெட்ரோ நிலையங்கள் மூடப்பட்டதுடன், ஏராளமான ரயில்களும் ரத்து செய்யப்பட்டு தலைநகரம் ஒரு பாதுகாப்பு கோட்டையாக மாற்றப்பட்டுள்ளது.
இதேபோன்று தேசிய அளவில் எதிரொலித்த இந்தப் போராட்டத்தின் தாக்கம் தமிழ்நாட்டிலும் தீவிரமடைந்தது. சென்னை பெசன்ட் நகர் கடற்கரை மற்றும் சேலம் உள்ளிட்ட பல பகுதிகளில் சிஜேபி ஆதரவாளர்கள் மற்றும் இடதுசாரி அமைப்பினர் போராட்டத்தில் குதித்தனர். ஆனால், தமிழ்நாட்டில் அமைதியான முறையில் போராடிய இளைஞர்களை காவல்துறையினர் குண்டுக்கட்டாக கைது செய்து சமுதாய நலக்கூடங்களில் அடைத்தனர். டெல்லியில் மத்திய அரசும், தமிழ்நாட்டில் மாநில அரசும் போராட்டக்காரர்களை ஒடுக்கும் விதம் ஒரே மாதிரி இருப்பதாக பொதுவெளியில் விமர்சனங்கள் எழுந்துள்ளன.
கைது செய்யப்பட்ட இளைஞர்களை விடுவிக்கக் கோரி திமுக எம்பிக்கள் மற்றும் முன்னாள் அமைச்சர்கள் உடனடியாக சமுதாய நலக்கூடத்திற்கு முன்பு திரண்டு போராட்டத்தில் ஈடுபட்டனர். இதன் காரணமாக காவல்துறையினர் அவர்களை வேறுவழியின்றி விடுவிக்க வேண்டிய கட்டாயம் ஏற்பட்டது. இந்தச் சூழலை மையமாக வைத்து கருத்து தெரிவித்துள்ள திமுக எம்பி கனிமொழி, தமிழ்நாட்டில் போராடுபவர்களை ஒடுக்கும் தவெக அரசும், டெல்லியில் உள்ள பாஜக அரசும் ஒன்றுதான் என்று கடுமையாக சாடியுள்ளார். மேலும், “டெல்லியில் இருக்கும் தவெகதான் பாஜக, தமிழ்நாட்டில் இருக்கும் பாஜகதான் தவெக” என்று அவர் தனது எக்ஸ் பக்கத்தில் விமர்சித்துள்ளார்.
மத்திய அரசின் இத்தகைய எதேச்சதிகாரப் போக்கு கடுமையான கண்டனத்திற்கு உள்ளாகியுள்ளது. அமைதியான முறையில் போராட முயல்பவர்களை முடக்குவதுடன், இணைய சேவைகளைத் துண்டிப்பது மற்றும் பாதுகாப்புப் படையினரைக் குவித்து அடக்குமுறையைக் கையாள்வது ஜனநாயகத்திற்கு விரோதமான செயலாகும் என்று கனிமொழி உள்ளிட்ட தலைவர்கள் குரல் கொடுத்துள்ளனர். கைது செய்யப்பட்ட அனைவரும் உடனடியாக விடுதலை செய்யப்பட வேண்டும் என்றும், மக்களின் அடிப்படை உரிமைகளை ஒடுக்கும் இந்த நடவடிக்கைகள் தடுத்து நிறுத்தப்பட வேண்டும் என்றும் நாடு முழுவதும் கோரிக்கைகள் வலுத்து வருகின்றன.