பீகார் மாநிலத்தைச் சேர்ந்த ஒரு மாமியார், பெங்களூருவில் வசிக்கும் தனது மருமகளுக்கு மிகவும் பிரசித்தி பெற்ற மற்றும் அவருக்குப் பிடித்தமான ‘மால்டா’ வகை மாம்பழங்களை ஒரு சூட்கேஸ் முழுவதும் நிரப்பி அனுப்பி வைத்துள்ளார். சமூக வலைதளங்களில் வைரலாகி வரும் இந்த நெகிழ்ச்சியான சம்பவம், மாமியார் மற்றும் மருமகள் இடையே உள்ள அன்பான உறவை அழகாகப் பிரதிபலிக்கும் வகையில் அமைந்துள்ளது.
பொதுவாக மாமியார் – மருமகள் உறவு என்றாலே சண்டையும் சச்சரவும் தான் நினைவுக்கு வரும் என்ற பொதுப் பிம்பத்தை உடைக்கும் விதமாக இந்த நிகழ்வு அமைந்துள்ளது. அந்தப் பெண், மாம்பழங்கள் நிறைந்த தனது சூட்கேஸின் புகைப்படத்தைப் பகிர்ந்து, “பீகாரில் இருந்து பெங்களூருவுக்கு வந்து சேர்ந்த அன்பு” எனக் குறிப்பிட்டிருந்தார். இந்த வித்தியாசமான மற்றும் பாசப் பரிசைக் கண்டு இணையவாசிகள் பலரும் தங்களது நெகிழ்ச்சியை வெளிப்படுத்தி வருகின்றனர்.
சமூக வலைதளப் பக்கங்களில் இந்த விவகாரம் காட்டுத்தீயாகப் பரவி வரும் நிலையில், பயனர்கள் பலரும் தங்களது கருத்துக்களைப் பகிர்ந்து வருகின்றனர். “இது வெறும் மாம்பழங்கள் அடங்கிய சூட்கேஸ் அல்ல, அன்பு மற்றும் பாசம் நிறைந்த பெட்டகம்” என்றும், “இப்படி ஒரு மாமியார் கிடைக்க அந்த மருமகள் கொடுத்து வைத்தவர்” என்றும் பாராட்டி, தங்களின் வாழ்த்துக்களைக் குவித்து வருகின்றனர்.