இந்தியாவிற்கான ஐக்கிய அரபு அமீரகத்தின் (UAE) தூதர் ஹுசைன் ஹசன் மிர்சா, இஸ்ரேல் மற்றும் ஈரான் இடையேயான தற்போதைய போரை முடிவுக்குக் கொண்டு வர இந்தியப் பிரதமர் நரேந்திர மோடியால் முடியும் என்று நம்பிக்கை தெரிவித்துள்ளார். பிரதமர் மோடி இஸ்ரேல் மற்றும் ஈரான் ஆகிய இரு நாடுகளின் தலைவர்களிடமும் ஒரே ஒருமுறை தொலைபேசியில் பேசினால் போதும், இந்த மோதல் உடனடியாக நின்றுவிடும் என்று அவர் ஒரு பேட்டியில் குறிப்பிட்டுள்ளார்
பிரதமர் மோடிக்கு வளைகுடா நாடுகளின் தலைவர்கள் மட்டுமின்றி, அங்குள்ள வணிக சமூகம் மற்றும் பொதுமக்கள் மத்தியிலும் மிகப்பெரிய மதிப்பும் மரியாதையும் இருப்பதாக மிர்சா சுட்டிக்காட்டியுள்ளார். இந்தியா இரு நாடுகளுடனும் சமமான நட்புறவைப் பேணி வருவதால், இந்தப் பதற்றத்தைத் தணிக்கும் தனித்துவமான ராஜதந்திர நிலையில் இந்தியா உள்ளதாகவும், மோடியின் தலையீடு அமைதிக்கு வழிவகுக்கும் என்றும் அவர் பாராட்டியுள்ளார்.
அதே நேரத்தில், இந்த மோதலில் ஐக்கிய அரபு அமீரகம் நடுநிலை வகிக்கவே விரும்புவதாகவும், தனது மண்ணை எந்தவொரு தரப்பும் தாக்குதலுக்குப் பயன்படுத்த அனுமதிக்க மாட்டோம் என்றும் அவர் தெளிவுபடுத்தியுள்ளார். ஏற்கனவே இந்தப் போர் காரணமாக அமீரகத்தில் சில பாதிப்புகள் ஏற்பட்டுள்ள நிலையில், அமைதிப் பேச்சுவார்த்தைக்கு இந்தியாவால் மட்டுமே தலைமை தாங்க முடியும் என்பதே அவரது கருத்தாக உள்ளது.