பிரதான் மந்திரி கரிப் கல்யாண் அன்ன யோஜனா (PMGKAY) திட்டத்தின் கீழ் தகுதியுள்ள ஏழை எளிய குடும்பங்களுக்கு மாதந்தோறும் ஒரு நபருக்கு 5 கிலோ உணவு தானியங்கள் இலவசமாக வழங்கப்பட்டு வருகின்றன. இத்திட்டத்தில் தற்போது ஒரு முக்கிய தொழில்நுட்ப மாற்றம் செய்யப்பட்டுள்ளது. வரும் ஆகஸ்ட் 2026 முதல் பயனாளிகளுக்கான ரேஷன் மானியத் தொகை ‘டிஜிட்டல் நாணயம்’ (CBDC) மூலம் நேரடியாக வழங்கப்பட உள்ளது. இந்த புதிய முறையின் கீழ், பயனாளியின் ஆதார் எண்ணுடன் இணைக்கப்பட்டுள்ள மொபைல் எண்ணைக் கொண்டு ஒரு டிஜிட்டல் வாலட் (Digital Wallet) உருவாக்கப்பட்டு, அதில் மத்திய அரசின் மானியத் தொகை டிஜிட்டல் நாணய வடிவில் வரவு வைக்கப்படும்.
இந்த வாலட்டில் வரும் தொகையைப் பயன்படுத்தி, பயனாளிகள் அரசு அங்கீகரித்துள்ள நியாயவிலைக் கடைகளில் தங்களுக்குத் தேவையான உணவுத் தானியங்களைப் பெற்றுக் கொள்ளலாம். இந்த புதிய தொழில்நுட்ப வசதி தடையின்றி செயல்பட, பயனாளிகள் தங்களது ஆதார் அட்டையுடன் இணைக்கப்பட்ட மொபைல் எண் சரியாக உள்ளதா என்பதைச் சரிபார்ப்பது கட்டாயமாக்கப்பட்டுள்ளது. இதற்கான கடைசி நாளாக ஜூலை 5 நிர்ணயிக்கப்பட்டுள்ளது. இந்தத் தேதிக்குள் மொபைல் எண் சரிபார்ப்புப் பணியை முடிக்காத பயனாளிகளுக்கு, வரும் காலங்களில் ரேஷன் மானியத் தொகை கிடைப்பதில் சிக்கல் ஏற்பட வாய்ப்புள்ளதாக குடிமைப்பொருள் வழங்கல் மற்றும் நுகர்வோர் விவகாரங்கள் துறை எச்சரித்துள்ளது.
பயனாளிகள் தங்களின் ஆதார் மற்றும் ரேஷன் கார்டுடன் இணைக்கப்பட்டுள்ள மொபைல் எண்ணில் ஏதேனும் திருத்தங்கள் செய்ய வேண்டியிருந்தால், உடனடியாக அருகிலுள்ள நியாயவிலைக் கடைகளுக்குச் சென்று வேலை நாட்களில் புதுப்பித்துக் கொள்ளலாம். இந்தச் சரிபார்ப்பு மற்றும் திருத்தப் பணிகளுக்காக நியாயவிலைக் கடைக்குச் செல்லும்போது, பயனாளிகள் தங்களின் ஆதாருடன் இணைக்கப்பட்ட மொபைல் போனைத் தவறாமல் உடன் எடுத்துச் செல்ல வேண்டும். திருத்தப் பணிகள் வெற்றிகரமாக முடிந்தவுடன் பயனாளியின் மொபைல் எண்ணுக்கு குறுஞ்செய்தி (SMS) அனுப்பப்படும். எனவே, ஏழை எளிய மக்களுக்கான இந்த இலவச ரேஷன் மானியம் எவ்விதத் தடையுமின்றி தொடர்ந்து கிடைக்க, குறிப்பிட்ட காலக்கெடுவிற்குள் மொபைல் எண் சரிபார்ப்பை முடிக்குமாறு கேட்டுக் கொள்ளப்படுகிறார்கள்.