மொத்தமாகச் சிக்கிய மாஜிக்கள்… தமிழ்நாட்டை உலுக்கிய பொதுப்பணித்துறை ஊழல்… அமைச்சர் ஆதவ் அர்ஜுனா அதிரடி… ஊழல் திமிங்கிலங்களை வேட்டையாடத் தயாரான விஜய் அரசு…!

தமிழ்நாட்டில் தற்போதைய அரசு நேர்மையுடனும் வெளிப்படைத்தன்மையுடனும் நிர்வாகத்தை நடத்தி வரும் நிலையில், கடந்த ஆட்சிகளில் பொதுப்பணி மற்றும் நெடுஞ்சாலைத்துறையில் திட்டமிட்ட விதிமீறல்களும், முறையான லஞ்ச அமைப்புகளும் செயல்பட்டு வந்ததாகப் பொதுப்பணி மற்றும் விளையாட்டுத் துறை அமைச்சர் ஆதவ் அர்ஜுனா பரபரப்பு குற்றச்சாட்டை முன்வைத்துள்ளார். இது தொடர்பாக அவர் வெளியிட்டுள்ள செய்திக்குறிப்பில், முந்தைய காலகட்டங்களில் மையப்படுத்தப்பட்ட ஊழல்களும், நிர்ணயிக்கப்பட்ட லஞ்சத் தொகைகளும் வசூலிக்கப்பட்டுப் பெரும் முறைகேடுகள் அரங்கேறியுள்ளதாகக் குறிப்பிட்டுள்ளார். தமிழக அரசியல் களம் பல்வேறு விவகாரங்களால் சூடுபிடித்துள்ள இச்சூழலில், அமைச்சரின் இந்த அதிரடி அறிவிப்பு அரசியல் வட்டாரத்தில் பெரும் முக்கியத்துவத்தைப் பெற்றுள்ளது.

கடந்த ஆட்சிக்காலத்தில் அதிகாரத்தில் இருந்தவர்கள், அவர்களின் குடும்ப உறுப்பினர்கள் மற்றும் நெருங்கிய உறவினர்கள் ஆகியோர் பொதுப்பணி மற்றும் நெடுஞ்சாலைத்துறையின் ஒப்பந்தங்களைப் பெற்றுத் தருவதாகக் கூறி பல்வேறு ஒப்பந்ததாரர்களிடம் பெருமளவில் பணம் வாங்கி ஏமாற்றியுள்ளதாக அமைச்சர் தெரிவித்துள்ளார். அவ்வாறு பணத்தைப் பெற்றுக்கொண்ட போதிலும், பலருக்கு முறையாக வேலைகளை ஒதுக்கீடு செய்யாமல் ஒப்பந்ததாரர்களைத் திட்டமிட்டு ஏமாற்றியுள்ளதாகக் குற்றம் சாட்டியுள்ளார். இது போன்ற ஏமாற்று வேலைகளால் பாதிக்கப்பட்ட ஒப்பந்ததாரர்களிடம் இருந்து தற்போதைய அரசுக்குத் தொடர்ந்து ஏராளமான புகார்கள் வந்த வண்ணம் உள்ளதாகவும் அவர் சுட்டிக்காட்டியுள்ளார்.

இவ்வாறு முந்தைய ஆட்சியில் பணம் கொடுத்து ஏமாற்றப்பட்டவர்களும் பாதிக்கப்பட்டவர்களும் தங்களின் புகார்களை நேரடியாக அமைச்சரிடமோ அல்லது லஞ்ச ஒழிப்பு காவல் துறையினரிடமோ தெரிவிக்கலாம் என அமைச்சர் ஆதவ் அர்ஜுனா வெளிப்படையான அழைப்பு விடுத்துள்ளார். மேலும், minister.pwd.hd.tn@gmail.com என்ற அதிகாரப்பூர்வ மின்னஞ்சல் முகவரி மூலமாகவும் புகார்களை அனுப்பலாம் என்றும், புகார் அளிப்பவர்களின் விவரங்கள் முற்றிலும் ரகசியமாகப் பாதுகாக்கப்பட்டு அவர்களுக்குத் தேவையான சட்ட பாதுகாப்பு வழங்கப்படும் என்றும் உறுதியளித்துள்ளார். பாதிக்கப்பட்டவர்கள் இழந்த பணத்தை மீட்க உரிய சட்ட நடவடிக்கைகள் விரைவில் எடுக்கப்படும் எனக் குறிப்பிட்ட அவர், இனிவரும் காலங்களில் பொதுப்பணி மற்றும் நெடுஞ்சாலைத் துறைகளின் அனைத்து ஒப்பந்தங்களும் எந்தவித முறைகேடுகளும் இன்றி முழுமையான நேர்மையுடனும் வெளிப்படைத் தன்மையுடனும் மட்டுமே நடைபெறும் என்று திட்டவட்டமாகத் தெரிவித்துள்ளார்.