தமிழக முதல்வர் மற்றும் திமுக தலைவர் மு.க. ஸ்டாலின், வரவிருக்கும் சட்டமன்றத் தேர்தலை முன்னிட்டு திமுக மாவட்டச் செயலாளர்கள் கூட்டத்தில் கட்சி நிர்வாகிகளுக்கு மிக முக்கியமான அறிவுறுத்தல்களை வழங்கியுள்ளார். சென்னை அண்ணா அறிவாலயத்தில் நடைபெற்ற இக்கூட்டத்தில் பேசிய அவர், திமுக கூட்டணியில் குழப்பத்தை ஏற்படுத்தச் சிலர் சூழ்ச்சி செய்யக்கூடும் என்றும், தோழமைக் கட்சிகளில் உள்ள ஒருசிலர் தேவையற்ற கருத்துகளைக் கூறினாலும் அதற்கு எதிர்வினையாற்றி யாரும் அந்த வலையில் விழுந்துவிடக் கூடாது என்றும் எச்சரித்தார். தொகுதிப் பங்கீடு மற்றும் கூட்டணிக் விவகாரங்களைத் தலைமை பார்த்துக்கொள்ளும் என்பதால், நிர்வாகிகள் அனைவரும் தேர்தல் களப்பணியில் மட்டும் முழு கவனம் செலுத்த வேண்டும் என்று அவர் வலியுறுத்தினார்.
அரசின் சாதனைகளைத் தமிழ்நாட்டின் ஒவ்வொரு வீட்டிற்கும் கொண்டு சேர்ப்பதே தற்போதைய பிரதான இலக்கு என்று குறிப்பிட்ட முதல்வர், தனிநபர்களை விடக் கட்சியே பெரியது என்பதை நிர்வாகிகள் உணர வேண்டும் என்றார். கடந்த ஐந்து ஆண்டுகளில் செயல்படுத்தப்பட்ட திட்டங்கள், குறிப்பாக பொங்கல் பரிசுத் தொகை மற்றும் மகளிர் உரிமைத் தொகை போன்ற மக்கள் நலத் திட்டங்களால் பயனடைந்த 2 கோடி பயனாளர்களைக் கட்சியின் உறுதிமிக்க வாக்காளர்களாக மாற்ற வேண்டும் என்று அறிவுறுத்தினார். தேர்தல் நெருங்கும் வேளையில் மக்கள் மத்தியில் எழும் விமர்சனங்களுக்குப் பொறுமையுடன் பதிலளிக்க வேண்டும் என்றும், அமைச்சர்கள் முதல் கிளைக் கழக நிர்வாகிகள் வரை அனைவரும் கண்துஞ்சாது உழைக்க வேண்டும் என்றும் அவர் கேட்டுக் கொண்டார்.
தேர்தல் பணிகளை முடுக்கிவிடும் வகையில், பிப்ரவரி மற்றும் மார்ச் மாதங்களில் மேற்கொள்ள வேண்டிய திட்டங்களையும் இக்கூட்டத்தில் அவர் அறிவித்தார். குறிப்பாக, பிப்ரவரி 1 முதல் மார்ச் 8 வரை திமுக மகளிர் தொண்டர்கள் வீடு வீடாகச் சென்று அரசின் திட்டங்களை விளக்குவதுடன், மாநிலத்தின் பல்வேறு பகுதிகளில் தேர்தல் பயிற்சி மாநாடுகள் நடத்தவும் முடிவு செய்யப்பட்டுள்ளது. வரும் மார்ச் 8-ஆம் தேதி திருச்சியில் ‘ஸ்டாலின் தொடரட்டும், தமிழ்நாடு வெல்லட்டும்’ என்ற தலைப்பில் பிரம்மாண்டமான மாநில மாநாடு நடைபெற உள்ளதாகவும், அதில் லட்சக்கணக்கான தொண்டர்கள் பங்கேற்று வெற்றிக்கான உத்வேகத்தைப் பெறுவார்கள் என்றும் இக்கூட்டத்தில் தீர்மானிக்கப்பட்டது.